دلہن نے مہر میں سو کتابیں مانگ لیں

بھارتی ریاست کیرالہ میں دلہن نے اس وقت سب کو حیرت زدہ کر دیا جب اس نے اپنے ہونے والے خاوند سے مہر میں نقدی، جائیداد، قیمتی زیورات یا ساز و سامان کی بجائے ایک سو کتابیں مانگ لیں۔

دولہا دلہن نے یہ بات خود تک محدود رکھی تاہم ان کے کچھ دوستوں نے اسے سوشل میڈیا پر شیئر کر دیا جس کے بعد یہ وائرل ہو گئی ہے۔

بھارتی میڈیا میں آنے والی خبروں کے مطابق اعجاز حکیم اور اجنا نظام کا نکاح اکتوبر میں ہوا تھا، جس میں اجنا نے اعجاز سے ایک سو کتابوں کا مطالبہ کر ڈالا۔  اعجاز نے  دلہن کی فراہم کردہ فہرست کے مطابق کتابیں حاصل کرنے کی سرتوڑ کوشش کی تاہم وہ شادی کی رات تک 97 کتابیں ہی اکٹھی کر پائے۔

99 کتابیں اکٹھی ہو گئی ہیں (ٹوئٹر)

البتہ اب ان کتابوں کی تعداد 99 ہو گئئ ہے اور سوویں کتاب، بھارت کا آئین، جلد ہی فراہم کر دی جائے گی جس کے بعد دلہن کی فرمائش مکمل ہو جائے گی۔

بھارتی میڈیا کے مطابق ان کتابوں میں قرآن، بائبل اور گیتا کے علاوہ خالد حسینی اور موراکامی کے ناول شامل ہیں۔ ٹوئٹر پر گردش کرنے والی تصاویر میں سابق امریکی خاتونِ اول مشیل اوباما کی آپ بیتی بھی دیکھی جا سکتی ہے۔

اس جوڑے نے اپنے بیڈروم میں ایک بڑا شیلف لگا دیا ہے جہاں یہ کتابیں رکھی گئی ہیں۔