انڈین کرکٹ ٹیم کے کپتان روہت شرما نے پاکستان کے خلاف ٹیسٹ کرکٹ کی بحالی کی حمایت کرتے ہوئے کہا کہ یہ بہت اچھا ہو گا۔
دونوں کرکٹ ٹیموں نے 2007 کے بعد سے آپس میں کوئی ٹیسٹ میچ نہیں کھیلا۔ تاہم دونوں ٹیمیں نیوٹرل مقامات پر مختصر فارمیٹ کے ٹورنامنٹس میں مقابلہ کر چکی ہیں۔
روہت جمعرات کو ایک یوٹیوب چیٹ شو میں نظر آئے جس کی میزبانی آسٹریلیا کے سابق کپتان ایڈم گلکرسٹ اور انگلینڈ کے مائیکل وان کر رہے تھے۔
شو کے دوران جب وان نے پوچھا کہ آیا پاکستان کے خلاف ٹیسٹ سیریز کھیلنا پانچ روزہ فارمیٹ کے لیے فائدہ مند ہو گا تو روہت نے کہا کہ میں اس پر مکمل یقین رکھتا ہوں۔
انہوں نے کہا کہ پاکستان ایک اچھی ٹیم ہے، اس کا بولنگ لائن اپ شاندار ہے اور مقابلہ اچھا ہوتا ہے۔ ’خاص طور پر اگر آپ غیر ملکی کنڈیشنز میں کھیلتے ہیں تو یہ بہت اچھا ہوگا۔‘
دو ستمبر، 2023 کو کینڈی میں ایشا کپ کے اختتام پر بابر اعظم اور روہت شرما مصافحہ کر رہے ہیں (اے ایف پی)
36 سالہ روہت نے گفتگو جاری رکھتے ہوئے کہا : ’میں پسند کروں گا۔ یہ دونوں فریقوں کے درمیان ایک بہت بڑا مقابلہ ہوگا ... تو کیوں نہیں؟‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
آسٹریلیا نے کہا ہے کہ وہ پاکستان اور انڈیا کے درمیان سیریز کی میزبانی کے لیے تیار ہے۔
پاکستان اور انڈیا نے 2012 کے بعد سے ایک دوسرے کی سرزمین پر کوئی دو طرفہ کرکٹ نہیں کھیلی۔
انڈیا نے گذشتہ سال ایشیا کپ کے لیے پاکستان جانے سے انکار کر دیا تھا جس کے بعد ٹورنامنٹ کا کچھ حصہ سری لنکا میں کھیلا گیا۔
دونوں ٹیمیں آخری بار اکتوبر میں انڈیا میں 50 اوورز کے ورلڈ کپ میں آمنے سامنے آئی تھیں۔
