’مجھے انڈے والا برگر کون کھلائے گا‘

کامیڈین علی گل پیر کی ’فرمائش‘ پر مکڈونلڈ پاکستان نے انہیں ’انڈے والا برگر‘ کھلانے کا عندیہ دے دیا۔

تصویر: اے ایف پی

آپ سب کو کچھ سال قبل وائرل ہونے والی وہ ویڈیو تو یاد ہی ہوگی، جب ایک نجی پاکستانی ٹی وی چینل کے ایک رپورٹر کچھ لوگوں میں گھرے نظر آئے، جو رپورٹر کو کنفیوژ کرنے کے ساتھ ساتھ مختلف طرح کے فقرے بھی کَس رہے تھے۔ ان ہی میں سے ایک جملہ تھا ’مجھے انڈے والا برگر چاہیے۔‘

اُن صاحب نے تو یہ جملہ بول دیا، لیکن پاکستانی سوشل میڈیا کی تاریخ میں یہ ہمیشہ ہمیشہ کے لیے رقم ہوگیا اور موقع بہ موقع لوگ ’انڈے والا برگر‘ کے گُن گاتے رہے۔

اب کامیڈین، مصنف اور ریپر علی گل پیر نے دوبارہ سے یہ موضوع چھیڑ کر پاکستانیوں کو ان کا پسندیدہ انڈے والا برگر یاد دلا دیا۔

ہوا کچھ یوں کہ علی گل پیر نے ٹوئٹر پر ایک ویڈیو شیئر کی، جس میں وہ مختلف ریستورانوں میں جاکر وہاں ’انڈے والے برگر‘ کی بابت معلوم کرتے نظر آئے اور انہیں مایوسی ہوئی کیونکہ بڑے بڑے ریستورانوں کے مینیو میں اس ’مشہورِ زمانہ برگر‘ کا نام و نشان تک نہ تھا۔

یہی وجہ ہے کہ علی گل پیر نے اپنی ٹویٹ میں لکھا: ’مجھے انڈے والا برگر کون کھلائے گا؟‘

بس ان کی یہ ٹویٹ کرنے کی دیر تھی کہ #AndayWalaBurger ٹوئٹر پر ٹرینڈ کرنے لگا اور  لوگ دھڑا دھڑ اپنے خیالات کا اظہار کرنے لگے۔

مشہور برگر چین ’مکڈونلڈز‘ کی پاکستان میں موجود شاخ تک بھی اس ہیش ٹیگ کی بازگشت پہنچی اور انہوں نے علی گل پیر کو مخاطب کرتے ہوئے لکھا: ’ہم نے آپ کو سنجیدگی سے لیا ہے۔ اگر زیادہ لوگوں نے آپ کی حمایت کی تو آپ کو انڈے والا برگر ملے گا۔‘

تاہم اس ٹویٹ سے یہ واضح نہیں ہو پایا کہ آیا مکڈونلڈز پاکستان صرف علی گل پیر کو ہی انڈے والا برگر فراہم کرے گا یا پھر اُس نے باقاعدہ طور پر اپنے میںیو میں یہ برگر شامل کرنے کا فیصلہ کیا ہے۔

یہی وجہ ہے کہ بہت سے لوگ مکڈونلڈز سے اس بارے میں سوال کرتے نظر آئے۔

نجی ٹی وی چینل سے وابستہ ایک سپورٹس رپورٹر نے اپنی ٹویٹ میں پوچھا: ’کیا یہ امیروں کا انڈے والے برگر ہوگا؟‘

ایک خاتون نے تنقید کرتے ہوئے لکھا کہ ’ انہوں نے انڈے والا برگر بھی 499 روپے کا کروا دینا ہے، معصوم لوگوں کی یہ خوشی بھی چھین لینا۔‘

دیگر لوگوں نے بھی کھانے کی خواہش ظاہر کی اور مکڈونلڈ کو مخاطب کرکے لکھا: ’ہمیں بھی انڈے والا برگر کھلائیں۔‘

ایک اور ٹوئٹر صارف نے تو اسے پاکستان کا ’قومی برگر‘ ہی قرار دے ڈالا۔

اب کوئی ٹوئٹر ٹرینڈ ہو اور اس پر میمز نہ بنیں، ایسا تو ہو ہی نہیں سکتا۔

کسی نے ایک جوڑے کی تصویر شیئر کی، جس میں کسی بڑے ریسٹورنٹ کے مینیو میں انڈے والا برگر دیکھ کر ان کے تاثرات دیکھے جاسکتے ہیں۔

 

 

زیادہ پڑھی جانے والی سوشل