’اب جنت کو آپ کی دھن مل گئی‘: بھارتی گلوکار کے کے چل بسے

بھارت میں فلمی موسیقی کی صنعت کو لاتعداد یادگار گانے دینے والے گلوکار کرشنا کمار کنتھ عرف کے کے کلکتہ میں ایک کنسرٹ کے بعد طبیعت ناساز ہونے کے بعد 53 سال کی عمر میں منگل کو انتقال کر گئے۔

بھارتی میڈیا کے مطابق سٹیج نیم ’کے کے‘ سے مشہور کرشنا کمار کنتھ کی طبیعت کلکتہ کے نظر المنچا آڈیٹوریم میں لائیو پرفارمنس کے دوران ناساز ہوئی۔

انڈین ایکسپریس کے مطابق پرفارمنس کے بعد انہیں کلکتہ میڈیکل اینڈ ریسرچ انسٹی ٹیوٹ لے جایا گیا، جہاں وہ جانبر نہ ہوسکے۔

ہندوستان ٹائمز کی ایک رپورٹ کے مطابق ہسپتال کے ایک سینیئر ڈاکٹر نے کہا کہ رات 10 بجے ہسپتال لائے جانے سے پہلے وہ غیر آرام دہ محسوس کر رہے تھے۔

ان کے بقول: ’ہسپتال پہنچے پر انہیں مردہ قرار دیا گیا تھا۔ یہ بدقسمتی ہے کہ ہم ان کا علاج نہ کر سکے۔‘

اخبار کے مطابق کنسرٹ کے بعد ہوٹل واپس پہنچنے پر وہ بھاری پن محسوس کر رہے تھے اور جلد ہی گر گئے۔ انہوں نے پرفارمنس کے دوران بھی طبیعت ناساز ہونے کی شکایت کی اور تیز روشنی سے پریشانی کا اظہار کیا۔ کنسرٹ سے واپسی پر انہوں نے گاڑی میں اے سی سے سردی لگنے کی شکایت بھی کی۔

ہندوستان ٹائمز کے مطابق کے کے کا پوسٹ مارٹم بدھ کو کیا جائے گا تاکہ موت کی وجہ کا تعین کیا جا سکے، تاہم ڈاکٹروں کو شک ہے انہیں دل کا دورہ پڑا۔

موت سے کچھ گھنٹے قبل ہی انہوں نے اپنے انسٹاگرام پر کنسرٹ کی ایک تصویر بھی شیئر کی تھی۔

کے کے کی موت کی خبر پر بھارتی وزیراعظم نریندر مودی اور بالی وڈ سمیت دنیا بھر سے تعزیت کا اظہار کیا گیا۔

وزیراعظم مودی نے ٹوئٹر پر اپنے تعزیتی پیغام میں کہا کہ ’ان کے گانے تمام عمر کے لوگوں کو بھائے۔ انہیں ان کے گانوں سے ہمیشہ یاد رکھا جائے گا۔‘

بھارتی سیاست دان راہول گاندھی نے بھی کے کے کے اہل خانہ سے تعزیت کی۔

 

اداکار اکشے کمار نے کہا کہ کے کے کی موت ایک بہت بڑا نقصان ہے۔

گلوکارہ شریا گھوشال نے کہا کہ کے کے سب سے نرم دل اور عاجز مزاج شخص تھے۔ 

عدنان سمیع نے کہا کہ ’انہیں اس کا یقین ہی نہیں آ رہا ہے۔‘

 

سابق بھارتی کرکٹر محمد کیف نے کہا کہ انہیں کے کے کے انتقال پر بہت افسوس ہے۔

اداکار ویوک اوبرائے، جن کی فلم ’ساتھیا‘ کے گانے کے کے کی آواز میں ریکارڈ ہوئے تھے، نے کہا کہ ’یہ سب کے لیے اداس دن ہے اور ہم بس ان کی یادوں کے ساتھ رہ گئے ہیں۔ ’جنت کو آپ کی دھن مل گئی ہے۔‘

اداکار منوج باجپائی نے کہا کہ ’وہ ہیرے جیسے انسان تھے۔‘

گلوکار اور میوسیقار انو ملک نے کہا کہ ’وہ بہت جلدی چلے گئے۔‘

اداکارہ پریتی زنٹا نے کہا کہ ’وہ کے کے کی موت کی خبر پر شاک میں ہیں۔  ‘

پاکستان میں بھی ان کی موت پر مداح غم زدہ ہیں اور ٹوئٹر پر ’ریسٹ اِن پیس کے کے‘ ٹرینڈ کر رہا ہے۔

پاکستانی اداکار رابعہ بٹ نے انسٹاگرام سٹوری میں اس خبر پر حیرانی کا اظہار کرتے ہوئے کہا کہ ’پہلے سدھو موسے والا اور اب کے کے۔‘

گلوکارہ مومنہ مستحسن نے بھی انسٹاگرام سٹوری میں سدھو موسے والا کے بعد کے کے کی موت پر افسوس کا اظہار کیا۔ 

گلوکار فرحان سعید نے ان کے گانے ’پیار کے پل‘ کے بول لکھ کر ایک پوسٹ شیئر کی۔ 

رومانس اور اداسی سے بھرے گانے

کے کے کا ڈیبیو البم ’پل‘ 1999 میں ریلز ہوا جس کے مشہور گانے ’پیار کے پل‘ اور ’یاروں‘ تھے۔

’پیار کے پل‘ کے بول ’چل سوچے کیا، چھوٹی سی ہے زندگی، کل مل جائے تو ہوگی خوش نصیبی‘ انسانی زندگی کی عارضی نوعیت کو اجاگر کرتی ہے۔  ’پیار کے پل‘ کے یوٹیوب پر اب تک 66 لاکھ سے زائد ویوز ہیں اور دوستی کی اہمیت کو مناتے گانے ’یاروں‘ کے 1.1 کروڑ سے زائد ویوز ہیں۔

ان کے مدھم سُروں اور میٹھی آواز نے جلد ہی مداحوں کے دل جیت لیے اور یوں وہ بالی وڈ کی پلے بیک دنیا میں بھی مشہور نام بن گئے۔

بالی وڈ کے لیے ان کا پہلا گانا 1999 میں سلمان خان اور ایشوریا رائے کی سپر ہٹ فلم ’ہم دل دے چکے صنم‘ کے لیے تھا۔

ان کی آواز میں ’تڑپ تڑپ کے اس دل سے‘ فلم کے سپر ہٹ گانوں میں سے ایک ثابت ہوا۔

اس کے بعد انہوں نے مڑ کر نہیں دیکھا اور بالی وڈ اور ساؤتھ انڈین سینیما کے لیے رومانس اور اداسی سے بھرے لاتعداد گانے گائے، جن میں سے ’اوم شانتی اوم‘ کا ’آنکھوں میں تیری‘ اور ’رہنا ہے تیرے دل میں‘ کا ’سچ کہہ رہا ہے دیوانہ‘  اور دیگر کئی ہٹ گانے شامل ہیں۔

نیوز 18 کے مطابق کے کے اگست 1968 میں دہلی میں پیدا ہوئے اور دہلی یونیورسٹی کے کروری مل کالج سے گریجویشن کے بعد اشتہاروں کے میوزک سے اپنے کیریئر کا آغاز کیا۔

ان کے سوگواروں میں اہلیہ جیوتی کرشنا اور دو بچے ہیں۔