13 اکتوبر، 2026 کو راول پنڈی میں پاکستان اور سری لنکا کے درمیان تیسرے ٹی 20 بین الاقوامی میچ کے دوران وجے کانت ویاسکانت پاکستان کے حسن نواز کی وکٹ لینے کے بعد خوشی کا اظہار کر رہے ہیں (اے ایف پی)

فرحان نے آخری میچ میں ناکافی رنز کو شکست کی وجہ قرار دیا۔

انہوں نے کہا ’ہم نے پہلے دو میچوں میں اچھی بیٹنگ کی تھی لیکن 168 رنز کا مجموعہ کافی نہیں تھا، اس لیے ہمیں آئندہ میچوں کے لیے اس کا تجزیہ کرنا ہوگا۔‘

ہدف کے تعاقب میں سری لنکا کا آغاز اچھا رہا اور اوپنر سنیتھ جے وردھنے نے جارحانہ بیٹنگ کرتے ہوئے 26 گیندوں پر پانچ چوکوں اور دو چھکوں کی مدد سے 38 رنز بنائے۔

 74رنز پر دو وکٹیں گرنے کے بعد مینڈس اور کمنڈو نے پاکستانی بولرز کو مزید کوئی کامیابی حاصل نہیں کرنے دی اور تیسری وکٹ کے لیے 98 رنز کی ناقابلِ شکست شراکت قائم کرکے ٹیم کو فتح دلائی۔

کمنڈو نے 27 گیندوں پر چار چوکوں کی مدد سے ناقابلِ شکست 40 رنز بنائے۔

سیریز میں پہلی مرتبہ پاکستان کو بیٹنگ میں مشکلات کا سامنا کرنا پڑا۔ 34 رنز کے مجموعی سکور پر اوپنر فخر زمان 12 رنز بنا کر آؤٹ ہوئے جبکہ معاذ صداقت اگلی ہی گیند پر بغیر کوئی رن بنائے پویلین لوٹ گئے۔

حسن نواز نے 16 اور عبدالصمد نے 15 رنز بنا کر فرحان کا ساتھ دیا۔ پاکستان نے آخری پانچ اوورز میں 59 رنز بنا کر سکور میں تیزی سے اضافہ کیا۔

آخری اوورز میں عرفات منہاس نے عمدہ بیٹنگ کی اور فرحان کے ساتھ ساتویں وکٹ کے لیے 66 رنز کی شراکت قائم کرکے پاکستان کا مجموعہ قابلِ ذکر حد تک پہنچایا۔

عرفات نے 20 گیندوں پر دو چوکوں اور دو چھکوں کی مدد سے ناقابلِ شکست 34 رنز بنائے۔

داسن شناکا کے علاوہ نووان تھشارا اور ایشان مالنگا نے بھی دو، دو وکٹیں حاصل کیں۔