حکومت پنجاب کی جانب سے لاہور میں 350 سال پرانے تاریخی نیلا گنبد کی بحالی کا کام جاری ہے اور اطراف میں مارکیٹیں اور تجاوزات ختم کر کے اس کی اصل حالت میں بحالی یقینی بنائی جا رہی ہے۔
شہر کی سب سے معروف مال روڈ جہاں صدیوں پرانی تاریخی عمارتیں سب سے زیادہ واقع ہیں، وہیں جنرل پوسٹ آفس (جی پی او) کے سامنے انارکلی بازار کے شروع میں ہی نیلا گنبد واقع ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
نیلا گنبد میں روحانی شخصیت عبدالرزاق مکی کا مقبرہ بھی واقع ہے، جسے 1674میں مغلیہ طرز تعمیر کے مطابق بنایا گیا تھا۔ اس کے بعد 1984میں اس کی تزئین و آرائش کی گئی تھی۔
اس کے اطراف میں دکانیں اور مکان بننے سے اس کی شناخت برائے نام رہ گئی تھی۔
پنجاب حکومت کے تاریخی لاہور بحالی کے پروگرام میں اس گنبد کی بحالی کا منصوبہ بھی شامل کیا گیا ہے، جس کے تحت نہ صرف اس کو نمایاں کیا جارہا ہے بلکہ اطراف سے تمام دکانیں اور گھر بھی مسمار کر دیے گئے ہیں۔
یہاں زیادہ جگہ اوقاف کی تھی لیکن جن افراد کی ذاتی ملکیت تھی، انہیں حکومت نے جگہ کی قیمت ادا کر کے جگہ خالی کروائی ہے۔
لاہور انتظامیہ کے مطابق انار کلی بازار اور نیلا گنبد کے سامنے زیر زمین پلازہ تعمیر کیا جا رہا ہے، جس پر اڑھائی ارب روپے خرچ کیے جائیں گے۔ یہاں دو منزلیں پارکنگ کے لیے ہوں گی جب کہ ایک منزل پر کاروباری سرگرمیاں ہو سکیں گی۔
