پاکستان سپر لیگ (پی ایس ایل) 6 کے آفیشل ترانے پر مداحوں کے ملے جلے تاثرات سامنے آئے تھے لیکن میوزک گروپ ’پُٹھی ٹوپی گینگ‘ کا ترانہ لوگوں میں مقبولیت حاصل کر رہا ہے۔

پی ایس ایل 6 کا آفیشل ترانہ ’گروو میرا‘ گلوکارہ نصیبو لعل، آئمہ بیگ، طلحہٰ انجم اور طلحہ یونس نے گایا تھا، جس میں خاص طور پر پنجابی گلوکارہ نصیبو لعل پر بہت تنقید کی گئی تھی۔

لیکن دو روز قبل ’پُٹھی ٹوپی گینگ‘ کی جانب سے یوٹیوب پر ریلیز کیے گئے گانے ’چل جواناں‘ کو اب تک پانچ لاکھ سے زائد بار دیکھا اور سنا جاچکا ہے۔

سوشل میڈیا پر بھی لوگ اس نئے ترانے کو شیئر کرکے اسے سراہ رہے ہیں۔

علی ایان کے ٹوئٹر ہینڈل سے ایک صارف نے اس ترانے کو ’زبردست‘ قرار دیا۔

علی کہلون نامی ایک صارف نے لکھا: ’پی ایس ایل 6 کا یہ ترانہ ’گروو میرا‘ سے بہت بہتر ہے۔‘

ترانے کی ویڈیو میں نظر آنے والےبھولا ریکارڈ کی تصویر شیئر کرتے ہوئے بابر علی نے لکھا: ’پی ایس ایل 6 کے آفیشل ترانے سے لاکھ گنا بہتر ہے۔‘

دیگر لوگوں نے بھی اس ترانے کی تعریفیں کیں۔