بابراعظم اور جو کلارک کی دھواں دار اننگز نے ملتان سلطانز کو ایک بڑے سکور کے باوجود زیر کر لیا۔
ملتان سلطانز کے 195 رنز کے جواب میں بابراعظم اور جو کلارک کی 57 گیندوں پر97 رنز کی شراکت داری نے کراچی کی فتح کو آسان بنا دیا۔
بابر اعظم کی 90 رنز کی کراچی کنگز کی طرف سے میچ کی خاص بات تھی۔
ہفتہ کی سہ پہر پی ایس ایل کے نویں میچ میں ملتان سلطانز کے خلاف کراچی کنگز کے کپتان عماد وسیم نے ٹاس جیت کر پہلے بولنگ کا فیصلہ کیا جس کی وجہ گذشتہ میچز میں پہلے بولنگ کرنے والی ٹیموں کا آسانی سے کامیاب ہونا تھا۔
دونوں ٹیموں نے اپنے سکواڈ میں کوئی تبدیلی نہیں کی تھی۔
ملتان سلطانز کا آغاز بہت عمدہ رہا اور اوپنرز کرس لین جو گذشتہ میچز میں خاص کارکردگی نہیں دکھا سکے تھے اور رضوان نے پاور پلے کا بھرپور فائدہ اٹھایا۔ ملتان نے پاور پلے میں 72 رنز بنائے جس کا فائدہ پوری اننگز کو ہوا۔
نئے آنے والے جیمز ونس نے بھی رضوان کے ساتھ رنز کی رفتار کو تیز رکھا جس سے کراچی کنگز کی بولنگ مسلسل دباؤ میں رہی۔
ملتان سلطانز کے 100 رنز 10ویں اوور میں مکمل ہوئے۔ دوسرے آؤٹ ہونے والے بلے باز رضوان تھے جو 43 رنز بنا کر آؤٹ ہوئے جبکہ جیمز ونس نے 45 رنز کی اننگز کھیلی۔
196 رنز کے ہدف کے تعاقب میں کراچی کنگز کا آغاز بھی اچھا تھا۔ پاور پلے میں کراچی نے ایک وکٹ کے نقصان پر 68 رنز جوڑے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
کراچی کنگز کی پہلی وکٹ 56 رنز پر گری جب شرجیل خان 27 رنز بناکر نوجوان بولر دھانی کی گیند پر آؤٹ ہوئے۔
نئے آنے والے بلے باز جو کلارک نے بابر اعظم کے ساتھ جیت کی بنیاد رکھی۔ دونوں بلے بازوں نے ملتان کے کسی بھی بولر کو خاطر میں لائے بغیر رنز کی رفتار تیز رکھی اور ہدف کی جانب سفر جاری رکھا۔
جو کلارک نے 54 رنز بنائے انہیں بھی شاہنواز دھانی نے آؤٹ کیا۔
بابر اعظم نے ناقابل شکست 90 رنز بنائے۔ ان کی اننگز میں 13 چوکے اور ایک چھکا شامل تھا۔ بابر اعظم کا یہ پی ایس ایل میں سب سے زیادہ سکور ہے۔
کراچی کنگز نے مطلوبہ ہدف تین وکٹوں کے نقصان پر ایک اوور پہلے ہی حاصل کر لیا۔
اس فتح کے بعد کراچی کنگز نے تین میچ کھیل کر چار پوائنٹس حاصل کر لیے ہیں۔
