زلزلہ متاثرین: راشد خان کی شاہد آفریدی سے سپورٹ کی درخواست

افغانستان کے معروف لیگ سپنر راشد خان نے ملک میں حالیہ زلزلے سے ہونے والی تباہی کے بعد متاثرہ افراد کے لیے مدد کی اپیل کی ہے۔

راشد خان نے اس حوالے سے ٹوئٹر پر ایک ویڈیو پیغام جاری کیا ہے جس میں انہوں نے زلزلہ متاثرین کی امداد کے لیے امداد جمع (فنڈ ریزنگ) کی مہم کا آغاز کرنے کا کہا ہے۔

انہوں نے کہا ہے کہ ’میں اس مشکل گھڑی میں متاثرہ خاندانوں اور افراد کی مدد کرنے کے لیے فنڈ جمع کر رہا ہوں اور یقیناً آپ سب کی سپورٹ بہت اہم ہے۔‘

خیال رہے کہ افغانستان میں رواں ماہ 22 جون کو آنے والے زلزلے کے نتیجے میں اب تک ہزار سے زائد افراد ہلاک اور متعدد خاندان بے گھر ہو چکے ہیں۔

رواں ہفتے منگل اور بدھ کی درمیانی شب افغانستان میں 6.1 شدت کا زلزلہ آیا جس کے نتیجے میں مکانات کو نقصان پہنچا اور سینکٹروں کی تعداد میں افراد زخمی ہوئے ہیں۔

افغان خبر رساں ایجنسی باختر نیوز نے رپورٹ کیا ہے کہ زلزلے سے سب سے زیادہ نقصان صوبے پکتیکا میں ہوا، جہاں برملا، زیروک، ناکہ اور گیان میں ہلاکتیں ہوئی ہیں۔

اس صورتحال میں افغانستان کے سٹار بولر راشد خان نے زلزلے سے ہونے والی تباہی سے متاثرہ افراد کے لیے مدد کی اپیل کرتے ہوئے پاکستانی سٹار آل راؤنڈر شاہد آفریدی، ویسٹ انڈیز کے ڈوائن براوو اور بھارت کے ہردک پانڈیا سے بھی ان کا ساتھ دینے کی اپیل کی ہے۔

راشد خان نے ان آل راؤنڈرزکے حوالے سے کہا کہ ’میں شاہد آفریدی، ہردک پانڈیا اور ڈوائن براوو کو نامزد کرتا ہوں کہ وہ بھی ایک ویڈیو بنائیں اور اس نیک کام کو سپورٹ کریں۔‘

انہوں نے ویڈیو میں امداد بھیجنے کے لیے ’بیک ایون سٹرونگر‘ نامی ویب سائٹ کا پتہ بھی بتایا جہاں اب تک 21 ہزار پاؤنڈز سے زائد رقم جمع ہو چکی ہے۔

شاہد آفریدی، ہردک پانڈیا اور ڈوائن براوو کی جانب سے اب تک اس ویڈیو کے جواب میں تو کوئی پیغام سامنے نہیں آیا ہے تاہم شاہد آفریدی نے پشتو زبان میں ایک ٹویٹ ضرور کی ہے جس میں انہوں نے افغانستان کے متاثرہ افراد کے لیے امداد کی اپیل کی ہے۔

اسی بارے میں پاکستانی لیگ سپنر شاداب خان نے بھی ایک ٹویٹ کی ہے جس میں انہوں نے کہا ہے کہ ’مجھ سے جتنا ہوگا میں متاثرہ افراد کی مدد کروں گا اور میری ہر کسی سے بھی یہی درخواست ہے کہ جہاں تک ممکن ہو سکے اپنا حصہ ڈالیں۔‘

اسی طرح پاکستان کے وکٹ کیپر بلے باز محمد رضوان نے بھی افغانستان میں زلزلے سے ہونے والی تباہی پر افسوس کا اظہار کیا۔

محمد رضوان نے ٹویٹ کرتے ہوئے لکھا کہ ’افغانستان میں زلزلے ہونے والی تباہی پر افسردہ ہوں اور اس وقت سب کو اس مشکل وقت میں اکھٹا ہو کر مدد کرنی چاہیے۔ انسانیت کی کوئی حد نہیں ہوتی اور ہم سب ایک ہیں۔‘

پاکستانی فاسٹ بولر شاہین شاہ آفریدی نے بھی اس سانحے پر دکھ کا اظہار کیا اور مستحق افراد کی مدد کی درخواست کی۔