پاکستان کی خواتین فٹ بال ٹیم چار ملکی ٹورنامنٹ میں شرکت کے لیے آئندہ ماہ سعودی عرب روانہ ہو رہی ہے، جہاں وہ 11 جنوری کو اپنا پہلا میچ کھیلنے کے لیے میدان میں اترے گی۔

پاکستانی ٹیم کو 2013 میں غیر فعالیت کی وجہ سے فیفا کی پابندی کا سامنا کرنا پڑا تھا، تاہم 2017 میں پابندی ہٹائے جانے کے بعد بھی ٹیم غیر فعال ہی رہی۔

حال ہی میں پاکستان فٹ بال فیڈریشن (پی ایف ایف) نے پہلے سے زیادہ باقاعدگی سے کیمپ لگا کر خواتین کے قومی سکواڈ کو بحال کرنے کی کوشش کی ہے۔

پاکستان کی ٹیم نے گذشتہ ستمبر میں ساؤتھ ایشین فٹ بال فیڈریشن چیمپئن شپ میں بھی شرکت کی تھی اور مالدیپ کے خلاف 7-0 سے فتح حاصل کی تھی۔

پی ایف ایف کے ٹوئٹر ہینڈل سے کی گئی پوسٹ میں میچز کی تفصیلات کے ساتھ بتایا گیا: ’ہم 11 جنوری کو افریقی ملک کوموروس کے خلاف اپنی مہم کا آغاز کریں گے۔‘

ٹورنامنٹ میں پاکستانی ٹیم کو 15 اور 19 جنوری کو بالترتیب ماریشس اور سعودی عرب کے خلاف کھیلنا ہے۔

پاکستانی کھلاڑی ملک کے دھند والے موسم میں ان مقابلوں کے لیے تیاریاں کر رہی ہیں، تاہم سعودی عرب میں انہیں مختلف موسمی حالات کا سامنا کرنا پڑے گا۔

(ایڈٹنگ: عبداللہ جان، ترجمہ: عبدالقیوم شاہد)