ہانگ کانگ میں پولیس نے ایک خاتون ماڈل اور انفلوئنسر ایبی چوئی کے قتل کے الزام میں ان کے سابق شوہر، سابق سسر اور سابق جیٹھ کو گرفتار کرلیا ہے۔
خبر رساں ادارے ایسوسی ایٹڈ پریس (اے پی) کے مطابق خاتون کے جسم کے اعضا ایک ریفریجریٹر سے ملے تھے اور خیال کیا جا رہا ہے کہ ایک دیہاتی گھر کے برتن سے ملنے والی کھوپڑی بھی انہیں کی ہے۔
سپرنٹنڈنٹ ایلن چنگ نے بتایا کہ حکام نے ہفتے کو ایبی چوئی کے سابق شوہر کو گرفتار کیا، جن پر قتل کا مقدمہ درج کیا جائے گا۔
پولیس نے ایک بیان میں کہا کہ ایبی چوئی کے سابق سسر اور ان کے سب سے بڑے بیٹے پر قتل کے الزامات عائد کیے گئے ہیں جبکہ ان کی سابق ساس پر انصاف کی راہ میں خلل ڈالنے کا الزام ہے۔
سپرنٹنڈنٹ ایلن چنگ کا کہنا تھا کہ 28 سالہ ایبی چوئی کے اپنے سابق شوہر اور ان کے اہل خانہ کے ساتھ لاکھوں ہانگ کانگ ڈالر کے مالی تنازعات تھے۔
انہوں نے مزید کہا کہ ’کچھ لوگ‘ ایبی چوئی کے مالی اثاثوں کو سنبھالنے کے طریقے سے ناخوش ہیں۔
ایبی چوئی ایک ماڈل اور انفلوئنسر تھیں، جو اپنی چکاچوند زندگی اور فیشن شوز کی تصاویر انسٹاگرام پر ایک لاکھ سے زائد فالورز کے ساتھ شیئر کرتی تھیں۔ انہوں نے حال ہی میں پیرس فیشن ویک میں ڈیور شو میں شرکت کی تھی۔
ان کی آخری پوسٹ ایک ہفتہ قبل کی گئی تھی، جس میں انہوں نے ایک فیشن پبلیکیشن کے ساتھ ایک فوٹو شوٹ کیا تھا۔
ایبی چوئی کئی دنوں سے لاپتہ تھیں۔ جمعے کو پولیس کو ان کی مسخ شدہ لاش اور دستاویزات ملی تھیں۔ ان باقیات کو چین کی سرحد کے قریب ہانگ کانگ کے مضافاتی علاقے تائی پو گاؤں کے ایک گھر میں ایک ریفریجریٹر میں رکھا گیا تھا۔
اتوار کو نیوز بریفنگ کے دوران سپرنٹنڈنٹ ایلن چنگ نے کہا کہ حکام کو کھانا پکانے کے برتنوں میں سے ایک میں انسانی پسلیوں، بالوں اور ٹشوز کے ساتھ ایک نوجوان خاتون کی کھوپڑی بھی ملی، جس کے بارے میں خیال کیا جاتا ہے کہ وہ ایبی چوئی کی کھوپڑی ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
انہوں نے مزید کہا کہ فرانزک پیتھالوجسٹ کو دوسرے برتن میں تھوڑی سی انسانی ہڈیاں ملی ہیں۔
ان کا کہنا تھا کہ ’کھوپڑی کے دائیں جانب ایک سوراخ ہے، لہذا پیتھالوجسٹ کا ماننا ہے کہ یہ متاثرہ شخص پر مہلک حملہ ہوسکتا ہے۔‘
ایلن چنگ نے کہا کہ خیال کیا جاتا ہے کہ ایبی چوئی پر اس وقت حملہ کیا گیا تھا جب وہ کار میں تھیں اور جب وہ اس گھر پہنچیں تو وہ بے ہوش تھیں۔
پولیس اب بھی موت کا صحیح وقت معلوم کرنے اور ان کے ہاتھوں اور دھڑ کا سراغ لگانے کی کوشش کر رہی ہے۔
ایلن چنگ نے کہا پولیس نے اتوار کو ایک اور خاتون کو بھی گرفتار کیا، جن کے بارے میں خیال کیا جاتا ہے کہ دیگر مشتبہ افراد کی مبینہ طور پر مدد کرنے کے لیے، ان کے ماڈل کے سابق شوہر کے والد کے ساتھ تعلقات تھے۔
ایلن چنگ نے کہا کہ اس خاتون نے ماڈل کے سابق سسر کے ساتھ مل کر گھر کرائے پر لیا اور ان کے سابق شوہر کو چھپانے کے لیے بھی ایک اور جگہ کرائے پر لی تھی۔
