میٹا کے ترجمان نے منگل کی شب کہا ہے کہ فیس بک اور انسٹاگرام سمیت بعض سروسز تکنیکی مسئلے کی وجہ سے متاثر ہوئیں جسے اب ٹھیک کر دیا گیا ہے۔

میٹا کے ترجمان اینڈی سٹون نے ایکس پر کہا ہے کہ ’آج ایک تکنیکی مسئلے کی وجہ سے لوگوں کو ہماری بعض سروسز تک رسائی حاصل کرنے میں مشکلات ہوئیں۔‘

انہوں نے کہا کہ ’اس مسئلے کو جتنا جلد ممکن ہو سکا ٹھیک کر دیا گیا اور ہم اس تکلیف کے لیے معذرت خواہ ہیں۔‘

پاکستان سمیت دنیا بھر میں منگل کی رات کو فیس بک اور انسٹاگرام اچانک سے بند ہو گئے تھے۔

اس حوالے سے میٹا کے ترجمان اینڈی سٹون نے ایکس پر بتایا تھا کہ ’ہم جانتے ہیں کہ لوگوں کو ہماری خدمات تک رسائی حاصل کرنے میں دشواری ہو رہی ہے۔ ہم اس پر کام کر رہے ہیں۔‘

منگل کو اچانک سے فیس بک لاگ ان کرنے کی کوشش پر دوبارہ لاگ ان سکرین سامنے نظر آنے لگی تھی لیکن اسے کلک کرنے پر یہی سکرین دوبارہ آ جاتی تھی۔

جو لوگ فیس بک پر تھے، ان کا سیشن ایکسپائر ہونے کا میسج آ گیا۔

اس سے کئی بہت سے لوگوں کو پریشانی کا سامنا کرنا پڑا ہے اور لوگ وٹس ایپ گروپوں میں میسج کر کے خدشہ ظاہر کیا کہ شاید ان کا اکاؤنٹ ہیک ہو گیا ہے۔

طاہر اسلام عسکری نامی ایک صارف نے ایک وٹس ایپ گروپ پر اطلاع دی: ’دوستو میرا فیس بک اکاؤنٹ ہیک ہو گیا ہے۔ اپنی فیس بک وال سے اطلاع نشر کر دیجیے۔‘

تاہم دوسرے لوگوں نے انہیں تسلی دی کہ ان کے ساتھ بھی یہی معاملہ درپیش ہے۔

ڈاون ڈیٹیکٹر نامی ویب سائٹ کے مطابق یہ مسئلہ پوری دنیا کو درپیش ہے۔ فیس بک کے علاوہ انسٹاگرام اور میسنجر صارفین نے بھی اپنے اکاؤنٹس سے اچانک لاگ آؤٹ ہونے کی اطلاع  ایکس پر دی ہے۔

سمرن وٹمین ایکس پر اپنی پوسٹ میں کہتی ہیں کہ ’کیا کسی اور کو فیس بک لاگ ان کرنے میں مشکلات کا سامنا ہے یا صرف میرے ساتھ ہی ایسا ہو رہا ہے؟‘

محمد عمران خان نامی ایک اور صارف نے ایک وٹس ایپ گروپ میں فیس بک بند ہونے کی خبر پر یوں تبصرہ کیا: ’زکربرگ شادی کی تقریبات میں مصروف ہیں۔‘

میٹا اپنے صارفین کی مصنوعات کے لیے سٹیٹس ظاہر نہیں کرتا، نہ ہی اس نے اب تک ٹوئٹر / ایکس پر اس بندش کے بارے میں کوئی معلومات دی ہیں۔

ٹریکنگ ویب سائٹ ڈاؤن ڈیٹیکٹر نے منگل کے روز انسٹاگرام، فیس بک اور میسنجر میں بڑے پیمانے پر بندش ظاہر کی ہے۔ یہ بندش پوری دنیا میں دیکھی گئی۔

وٹس ایپ بھی میٹا کمپنی کی ملکیت ہے مگر وہ فی الحال نارمل طریقے سے چل رہا ہے۔