بلوچستان کے دارالحکومت کوئٹہ میں ہفتے کو پولیس نے بتایا کہ ایک بم دھماکے میں دو افراد جان سے گئے جبکہ نو زخمی ہو گئے۔
ایس پی اختر نواز نے انڈپینڈنٹ اردو سے گفتگو میں واقعے کی تصدیق کرتے ہوئے بتایا کہ دھماکہ شام پانچ بجے کے قریب کوئٹہ کے نواحی علاقے سرہ غوڑگئی کے کلی منگل میں سڑک کنارے نصب بم کے پھٹنے سے ہوا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
انہوں نے بتایا کہ مرنے والے دونوں افراد بھائی تھے۔ زخمیوں کو سول ہسپتال کوئٹہ منتقل کر دیا گیا جب کہ سکیورٹی فورسز نے علاقے کو گھیرے میں لے کر تفتیش شروع کر دی۔
تاحال کسی گروہ نے دھماکے کی ذمہ داری قبول نہیں کی۔
اس واقعے سے ایک روز قبل جمعے کو مسلح افراد نے سوراب شہر میں داخل ہو کر متعدد سرکاری عمارتوں کو نذر آتش کرنے کے علاوہ ایک بینک کو لوٹنے کے بعد آگ لگا دی تھی۔
اس حملے میں اسسٹنٹ ڈپٹی کمشنر ہدایت اللہ بلیدی جان سے گئے تھے۔
یہ واقعات ایسے وقت میں پیش آئے جب وزیر اعظم شہباز شریف اور فیلڈ مارشل عاصم منیر گذشتہ دو روز سے کوئٹہ میں موجود ہیں۔
دونوں شخصیات نے آج کوئٹہ میں قبائلی عمائدین اور عوامی نمائندوں پر مشتمل گرینڈ جرگے میں شرکت کی اور خطاب کیا۔
وزیر اعظم شہباز شریف نے اپنے خطاب میں بلوچستان کے اندر دہشت گردی کے حالیہ واقعات کو انڈیا کی سازش قرار دیتے ہوئے کہا کہ جنگ کے میدان میں شکست کے بعد انڈیا صوبے میں موجود ’اپنے ایجنٹس کے ذریعے دہشت گردی‘ کروا رہا ہے۔
