پاکستان کرکٹ بورڈ (پی سی بی) نے منگل کو 2025-26 کے لیے سینٹرل کنٹریکٹس کا اعلان کر دیا ہے جس میں فاسٹ بولر نسیم شاہ کو بی کیٹیگری سے سی کیٹیگری میں تنزلی کی گئی ہے جبکہ اس بار ایک کھلاڑی بھی اے کیٹیگری میں جگہ نہیں بنا سکا۔
پی سی بی کی جانب سے جاری بیان کے مطابق اس بار مجموعی طور پر 30 کھلاڑیوں کو کنٹریکٹس دیے گئے ہیں جن میں 12 نئے نام بھی شامل ہیں۔ یہ کنٹریکٹس یکم جولائی 2025 سے 30 جون 2026 تک لاگو ہوں گے۔
گذشتہ سال 27 کھلاڑی کنٹریکٹ لسٹ کا حصہ تھے جبکہ اس بار تعداد بڑھا کر 30 کر دی گئی ہے۔ اس فہرست میں 12 نئے کھلاڑی بھی شامل ہیں جن میں احمد دانیال، فہیم اشرف، حسن علی، حسن نواز، حسین طلعت، خوشدل شاہ، محمد عباس، محمد حارث، محمد نواز، صاحبزادہ فرحان، سلمان مرزا اور سفیان مقیم شامل ہیں۔
بیان کے مطابق پرفارمنس کی بنیاد پر کھلاڑیوں کو کیٹیگری بی، سی اور ڈی میں تقسیم کیا گیا ہے اور ہر کیٹیگری میں 10،10 کھلاڑی شامل ہیں۔
بی کیٹیگری میں بابر اعظم، محمد رضوان، شاہین شاہ آفریدی، فخر زمان، شاداب خان، ابرار احمد، حارث رؤف، حسن علی، صائم ایوب اور سلمان علی آغا کو رکھا گیا ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
سی کیٹیگری میں عبداللہ شفیق، نسیم شاہ، سعود شکیل، فہیم اشرف، ساجد خان، محمد نواز، محمد حارث، صاحبزادہ فرحان، حسن نواز اور نعمان علی شامل ہیں۔
جبکہ ڈی کیٹیگری میں شان مسعود، حسین طلعت، محمد عباس، محمد وسیم جونیئر، محمد عباس آفریدی، خوشدل شاہ، احمد دانیال، سلمان مرزا، خرم شہزاد اور سفیان مقیم کو موقع دیا گیا ہے۔
پی سی بی کے مطابق 9 کھلاڑی اپنی سابقہ کیٹیگری برقرار رکھنے میں کامیاب رہے ہیں جبکہ آٹھ کھلاڑی اس بار کنٹریکٹ حاصل کرنے میں ناکام رہے۔
