سوئٹزرلینڈ کی فوڈ کمپنی نیسلے نے کہا ہے کہ اس کے کٹ کیٹ چاکلیٹ برانڈ کی تقریباً 12 ٹن، یعنی چار لاکھ 13 ہزار 793 چاکلیٹ بارز اٹلی سے پولینڈ لے جاتے ہوئے راستے میں چوری ہو گئیں۔

ویوے، سوئٹزرلینڈ میں قائم کمپنی نے گذشتہ جمعے کو جاری بیان میں کہا ’گاڑی اور اس کا سامان تاحال کہیں نہیں ملا۔‘

یہ کرسپی چاکلیٹ بارز جو ویفر پر مشتمل ہوتی ہیں اور چاکلیٹ سے ڈھکی ہوتی ہیں، گذشتہ ہفتے پیداوار کے مقام سے تقسیم کے مقام تک جاتے ہوئے غائب ہوئیں۔ یہ چاکلیٹس یورپ بھر میں تقسیم کی جانی تھیں۔

کمپنی کے مطابق یہ گمشدہ چاکلیٹ بارز یورپی منڈیوں میں مختلف طریقوں سے فروخت ہو سکتی ہیں۔

تاہم اگر ایسا ہوتا ہے تو ہر پروڈکٹ کو اس کے منفرد بیچ کوڈ کے ذریعے ٹریس کیا جا سکتا ہے۔

کٹ کیٹ کے ترجمان نے کہا کہ اس طرح صارفین، ریٹیلرز اور ہول سیلرز پیک پر موجود بیچ نمبر سکین کر کے معلوم کر سکیں گے کہ آیا کوئی پروڈکٹ چوری شدہ کھیپ کا حصہ ہے یا نہیں۔

اگر مماثلت ملتی ہے تو سکینر کو کمپنی کو اطلاع دینے کی واضح ہدایات دی جائیں گی، جس کے بعد کمپنی مناسب کارروائی کرے گی۔

بیان میں کہا گیا ’اگرچہ ہم مجرموں کے غیر معمولی ذوق کو سراہتے ہیں، لیکن حقیقت یہ ہے کہ کارگو چوری ہر سائز کے کاروبار کے لیے ایک بڑھتا ہوا مسئلہ بن چکی ہے۔‘

مزید کہا گیا ’چونکہ باقاعدگی سے زیادہ جدید طریقے استعمال کیے جا رہے ہیں، اس لیے ہم نے اپنے تجربے کو عوام کے سامنے لانے کا فیصلہ کیا ہے تاکہ اس بڑھتے ہوئے مجرمانہ رجحان کے بارے میں آگاہی پیدا کی جا سکے۔‘