پی ایس ایل 7: ’آگے دیکھ کے علاوہ کچھ سمجھ آیا نہیں‘

پاکستان سپر لیگ کے ساتویں سیزن کا ترانہ لانچ کر دیا گیا ہے جسے گلوگار عاطف اسلم اور آئمہ بیگ نے گایا ہے۔

پی ایس ایل 7 کا آفیشل گانا عاطف اسلم اور آئمہ بیگ نے گایا ہے (پاکستان سپر لیگ/ ٹوئٹر)

پاکستان سپر لیگ کے ساتویں سیزن کا ترانہ لانچ کر دیا گیا ہے جسے گلوگار عاطف اسلم اور آئمہ بیگ نے گایا ہے۔

پی ایس ایل 7 کے آغاز میں اب تین ہی دن باقی رہ گئے ہیں۔ سکواڈز نے ٹریننگز شروع کر دی ہیں، غیرملکی کھلاڑی آنا شروع ہو گئے ہیں، ایسے میں شائقین کو انتظار تھا تو صرف اس ’ترانے‘ کا۔

پاکستان سپر لیگ کی جانب سے بتایا گیا تھا کہ ترانہ پیر یعنی 24 جنوری کو لانچ کر دیا جائے گا۔ اس اعلان کے بعد آج صبح سے ہی سوشل میڈیا پر پی ایس ایل اینتھم ٹاپ ٹرینڈ بنا ہوا ہے۔

’آگے دیکھ، جیت سے بھی آگے دیکھ۔‘ کے بول کے ساتھ لانچ ہونے والے گانے میں اردو اور پنجابی زبان کے بول سننے کو ملتے ہیں۔

اگر اس گانے کو ماضی میں لانچ کیے جانے والے گانوں کے مقابلے میں دیکھا جائے تو یہ ’قدرے سلو‘ لگ رہا ہے، اور گانا شروع ہوتے ہی آپ انتظار کرنے لگتے ہیں کہ کب وہ موقع آئے گا جب یہ گانا آپ کو اپنی جگہ سے اٹھ کر جھومنے پر مجبور کرے گا۔

مگر یہ صرف ہماری رائے ہو سکتی ہے، دیکھتے ہیں کہ سوشل میڈیا پر اس گانے کا انتظار کرنے والے شائقین اس کے بارے میں کیا سوچتے ہیں۔

نایاب آفریدی نامی ٹوئٹر صارف کا کہنا ہے کہ ’میرے خیال میں بس ٹھیک ہی ہے۔‘ جبکہ فاطمہ مسرور کہتی ہیں کہ ’آئی لوو دس اینتھم، آگے دیکھ۔‘

مدثر میمن لکھتے ہیں: ’اس سانگ میں آگے دیکھ کے علاوہ اور کچھ تو سمجھ آیا نہیں ہے۔‘

پاکستان سپر لیگ کے ساتویں ایڈیشن کے آفیشل گانے کے ریلیز ہوتے ہی سوشل میڈیا پر بعض صارفین ایک مرتبہ پھر علی ظفر کے گائے گانے کو یاد کرتے بھی دکھائی دے رہے ہیں۔

یہاں یہ بھی بتاتے چلیں کہ پاکستان سپر لیگ کے اب تک ریلیز ہونے والے آفیشل گانوں میں پیر 24 جنوری تک سب سے زیادہ دیکھے جانے والا گانا ’اب کھیل جمے گا‘ ہے جسے علی ظفر نے چار سال قبل گایا تھا اور اسے اب تک 18 ملین بار دیکھا جا چکا ہے۔

دوسرے نمبر پر نصیبو لال کا ’گروو میرا‘ ہے جبکہ ویوز کے حساب سے تیسرے نمبر پر ’کھیل دیوانوں کا‘ ہے۔

دیکھنا یہ ہے کہ پاکستان سپر لیگ کے یوٹیوب پیج پر جاری ہونے والا یہ گانے کے ویوز کہا تک جاتے ہیں۔

پاکستان کرکٹ بورڈ کے مطابق پی ایس ایل 7 کے اس گانے کو مختصر ویڈیوز کی ایپ ٹک ٹاک نے سپانسر کیا ہے۔

ٹوئٹر پر ابراہیم علی نامی صارف لکھتے ہیں کہ ’عاطف کا گانا اچھا ہے مگر اسے علی ظفر کے ’اب کھیل جمے گا‘ کو پیچھے چھوڑنے میں کئی سال لگیں گے۔‘

محمد عمیر علی کہتے ہیں: ’گانا بہت پسند آیا۔ بیٹ، بول اور پکچرائیزیشن نے انصاف کیا ہے۔‘

اسی طرح صحافی زبیر علی خان لکھتے ہیں کہ ’اب تو گروو میرا بھی اچھا لگنے لگ گیا۔‘

زیادہ پڑھی جانے والی ٹرینڈنگ