چین میں سرکاری میڈیا کے مطابق پیر کو ایک مسافر طیارہ گوانگشی خطے کے شہر ووژو کے قریب دیہی علاقے میں گر کر تباہ ہوگیا ہے، جس میں 132 افراد سوار تھے۔

خبر رساں ادارے اے ایف پی نے چین کے سرکاری نشریاتی ادارے سی سی ٹی وی کے حوالے سے رپورٹ کیا کہ فضائی کمپنی چائنا ایسٹرن کا بوئنگ 737 طیارہ جس پہاڑی علاقے میں گرا، وہاں آگ لگ گئی۔

مزید کہا گیا کہ امدادی ٹیمیں جائے وقوعہ پر روانہ کر دی گئیں ہیں اور فی الوقت مسافروں کے حوالے سے کسی قسم کی معلومات نہیں ہیں۔

مقامی میڈیا نے ایئرپورٹ سٹاف کے حوالے سے رپورٹ کیا ہے کہ دوپہر ایک بجے کنمنگ شہر سے اڑان بھرنے کے بعد طیارہ گوانگ ژو میں اپنی منزل تک نہیں پہنچا۔

ایوی ایشن امور میں دلچسپی رکھنے والے صحافی طاہر عمران میاں کے مطابق حادثے کا شکار ہونے والا طیارہ جون 2015 میں چائنا ایسٹرن کے بیڑے میں شامل ہوا تھا اور یہ سات سال پرانا ہے۔

تیل کی قیمتوں میں اضافے اور روس-یوکرین تنازعے کی پیش رفت کو مدنظر ہوئے پیر کو امریکی سٹاک انڈیکس میں نمایاں کمی دیکھی گئی، جب کہ چین میں 737 جیٹ کے حادثے کے بعد بوئنگ کے حصص بھی گر گئے۔ چائنا ایسٹرن ایئرلائنز کا مسافر طیارہ جنوبی چین کے پہاڑوں میں گر کر تباہ ہونے کے بعد طیارہ ساز کمپنی کے حصص پری مارکیٹ ٹریڈنگ میں 7.8 فیصد گر گئے۔ حادثے کی وجہ کے بارے میں فوری طور پر کچھ نہیں بتایا گیا۔