بھارتی کرکٹ ٹیم کے سابق کپتان وراٹ کوہلی ’خراب فارم‘ کی وجہ سے کافی عرصے سے تنقید کا نشانہ بن رہے ہیں۔ وہ نومبر 2019 کے بعد سے بین الاقوامی کرکٹ میں سینچری سکور نہیں کر سکے اور گذشتہ روز انگلینڈ کے خلاف میچ میں بھی محض 16 رنز بنا کر آؤٹ ہو گئے۔

ایک لمبے عرصے تک دنیائے کرکٹ کے نمبر ون کھلاڑی رہنے والے وراٹ کوہلی کے آؤٹ آف فارم ہونے پر جہاں ان کے مداح انہیں سپورٹ کر رہے ہیں وہیں کئی ناقدین اور کرکٹ فینز انہیں تنقید کا نشانہ بناتے ہوئے ’آرام‘ کرنے کا مشورہ بھی دے رہے ہیں۔

ایسے میں جب زیادہ تر لوگ انہیں تنقید کا نشانہ بنا رہے ہیں، سرحد پار سے ان کا حوصلہ بڑھانے کے لیے ایک پیغام گیا جس نے بھارتی اور پاکستانی کرکٹ صارفین کے دل جیت لیے۔

پاکستانی کرکٹ ٹیم کے تینوں فارمیٹس کے کپتان اور عالمی نمبر ایک بلے باز بابر اعظم نے ٹوئٹر پر وراٹ کوہلی کے ساتھ اپنی تصویر شیئر کی اور ساتھ میں لکھا: ’یہ وقت بھی گزر جائے گا۔ ڈٹے رہیں۔‘

اپنی ٹویٹ میں بابر اعظم نے وراٹ کوہلی کے نام کا ہیش ٹیگ بھی استعمال کیا۔

رات گئے کی گئی اس ٹویٹ کا سوشل میڈیا پر خوب چرچا ہوا اور دونوں پڑوسی ممالک میں وراٹ کوہلی اور بابر اعظم کا نام ٹرینڈ کرنے لگا۔

بھارت اور پاکستان میں کرکٹ کے مداحوں نے اس ٹویٹ کو ’سپورٹس مین سپرٹ کا بہترین مظاہرہ‘ قرار دیا اور بابر اعظم پر ’آن لائن پیار‘ نچھاور کرنے لگے۔

ایک پاکستانی ٹوئٹر صارف نے بابر اور کوہلی کی تصویر شیئر کرتے ہوئے تحریر کیا: ’سرحدوں نے تقسیم کیا، کرکٹ نے متحد کر دیا۔‘

کروتک نامی ٹوئٹر صارف نے اپنے خیالات کا اظہار کرتے ہوئے لکھا: ’اس کھیل کو ٹھیک ہی جینٹل مینز گیم کہا جاتا ہے۔‘

کرکٹ مداح دیواکار نے بابر کی ٹویٹ پر اپنی خوشی کا اظہار کرتے ہوئے لکھا: ’پاکستانی کپتان کا بہترین رویہ۔‘

پرشانت جھا نامی ٹوئٹر صارف نے تحریر کیا: ’پاکستان اور بھارت کو اکٹھے دیکھنے سے زیادہ خوشی کی بات کیا ہو گی۔ بابر اعظم، میری نظر میں آپ کی عزت بہت بڑھ گئی ہے۔‘

بھارتی سپورٹس صحافی وکرنت گپتا نے اپنے جذبات کا اظہار کرتے ہوئے لکھا: ’بابر، آپ ہیرو ہیں۔‘

ایک اور ٹوئٹر صارف نے بابر اعظم کی ٹویٹ کی تصویر شیئر کی اور ساتھ میں لکھا: ’شاید یہ کرکٹ کے مداحوں کے لیے دہائی کی بہترین ٹویٹ ہے۔‘

کنزیٰ نامی کرکٹ مداح نے بابر اعظم کی ٹویٹ کو شیئر کرتے ہوئے لکھا: ’ایک ہی دل ہے کتنی بار جیتو گے بابر اعظم۔‘