کراچی میں گذشتہ 24 گھنٹوں کے دوران آٹھ مرتبہ زلزلے کے جھٹکے محسوس کیے گئے جس کے باعث شہریوں میں خوف و ہراس پھیل گیا۔
پاکستان میٹرولوجیکل ڈیپارٹمنٹ کی جاری کردہ معلومات کے مطابق تین جون کو کراچی کے علاقے ملیر میں رات 12 بج کر 42 منٹ پر بھی زلزلے کے جھٹکے محسوس کیے گئے۔
ریکٹر سکیل پر زلزلے کی شدت 2.6 ریکارڈ کی گئی اور اس کی گہرائی 40 کلو میٹر بتائی جا رہی ہے۔
کراچی میں زلزلوں کے جھٹکوں کا سلسلہ اتوار کی شام سے شروع ہوا جس میں ملیر، شاہ فیصل کالونی، لانڈھی، کورنگی، جعفر طیار اور بکرا پیڑی کی طرف جھٹکے محسوس کیے گئے جس کے بعد آفٹر شاکس محسوس کیے جاتے رہے۔
ماہر موسمیات جواد میمن نے انڈپینڈنٹ اردو سے گفتگو میں بتایا کہ ’کراچی میں گذشتہ 24 گھنٹوں کے دوران آٹھ مرتبہ زلزلے کے جھٹکے محسوس کیے گئے۔‘
انہوں نے بتایا کہ یکم جون کو شام 5:30 اور دو جون کو رات ایک بج کر 9 منٹ سے صبح 11 بجے تک یہ سلسلہ جاری رہا۔
بقول جواد میمن: ’ان زلزلوں کی شدت زیادہ نہیں تھی اور ریکٹر سکیل پر 3.2 سے 3.6 تک ریکارڈ کی گئی لیکن ان کا تسلسل لوگوں میں خوف و ہراس پھیلانے کا باعث بن رہا ہے۔
’لوگ رات کو گھروں سے باہر نکل آئے اور گھبراہٹ کا ماحول پیدا ہو گیا، بعض مقامات پر ہلکے درجے کی لرزش محسوس کی گئی جس کے بعد سوشل میڈیا پر افواہوں اور تشویش کا سلسلہ بھی دیکھنے میں آیا۔‘
جواد میمن کا مزید کہنا تھا کہ ’لانڈھی کے علاقے میں تاریخی طور پر موجود ایک غیر فعال دراڑ گذشتہ 24 گھنٹوں کے دوران متحرک ہوئی ہے۔
ان کے مطابق ’خوش آئند بات یہ ہے کہ ان زلزلوں کی شدت کمزور رہی اور کسی بھی جھٹکے کی شدت زیادہ محسوس نہیں کی گئی، کم شدت والے زلزلے عام طور پر ہلکے پھلکے جھٹکوں کی صورت میں ظاہر ہوتے ہیں جو کہ ایک معمول کی بات ہے۔‘
محکمہ موسمیات نے اس بات کی تصدیق کی ہے کہ گذشتہ 24 گھنٹوں میں کراچی میں یہ آٹھواں زلزلہ تھا اور ان جھٹکوں سے کوئی جانی یا مالی نقصان ہوا، آئندہ دو دنوں تک زلزلے کے جھٹکے محسوس کیے جا سکتے ہیں۔
سونامی وارننگ سیل کے سربراہ امیر حیدر نے انڈپینڈنٹ اردو سے گفتگو میں تصدیق کی ہے کہ ’یکم جون سے تین جون کے درمیان لانڈھی اور ملیر سے متصل علاقوں میں زلزلے کے 18 ہلکے جھٹکے محسوس کیے جا چکے ہیں۔
’ان جھٹکوں کی شدت معمولی تھی، تاہم گلستانِ جوہر میں بھی زلزلے کے اثرات رپورٹ کیے گئے ہیں۔‘
انہوں نے بتایا کہ ’تاحال کسی قسم کے جانی یا مالی نقصان کی اطلاع موصول نہیں ہوئی، تاہم اگر کسی علاقے کا انفراسٹرکچر کمزور ہو تو بار بار آنے والے جھٹکوں کے باعث دیواروں میں دراڑیں پڑ سکتی ہیں یا دیگر نقصانات کا خدشہ بھی ہے۔‘
انہوں نے شہریوں سے اپیل کی ہے کہ وہ گھبرائیں نہیں اور حفاظتی احتیاطی تدابیر اختیار کریں۔
امیر حیدر نے ماضی میں آنے والے زلزلوں پر بات کرتے ہوئے کہا کہ ’بلوچستان کے سومیانی علاقے میں تین ٹیکٹونک پلیٹس یوریشین، عریبین اور انڈین کا جنکشن ہے۔
’جہاں 1945 کے بعد کوئی بڑا زلزلہ نہیں آیا، تاہم وہاں انرجی مسلسل جمع ہو رہی ہے جس کے باعث اس مقام پر مستقبل میں زلزلے آنے کے امکانات روشن ہیں۔‘
زلزلے کیوں آتے ہیں؟
ماہرین کے مطابق: ’زلزلے زمین کی سطح کے اچانک ہلنے یا کپکپانے کو کہتے ہیں، یہ عام طور پر زمین کے اندر موجود ٹیکٹونک پلیٹوں کی حرکت کی وجہ سے آتے ہیں۔
زمین کی سطح کئی بڑی اور چھوٹی پلیٹوں پر مشتمل ہے جو آہستہ آہستہ حرکت کرتی رہتی ہیں۔
جب یہ پلیٹیں آپس میں رگڑ کھاتی ہیں، ٹکراتی ہیں یا ایک دوسرے کے نیچے دب جاتی ہیں تو زمین کے اندر بہت زیادہ توانائی جمع ہو جاتی ہے۔ جب یہ توانائی اچانک خارج ہوتی ہے، تو زلزلہ آتا ہے۔
پلیٹوں کی حرکات: زمین کی سطح مختلف پلیٹوں پر مشتمل ہے، جیسے پیسفک پلیٹ، یوریشین پلیٹ وغیرہ۔
فالٹ لائنز: وہ جگہیں جہاں پلیٹیں ٹکراتی یا رگڑ کھاتی ہیں، انہیں فالٹ لائنز کہتے ہیں۔
ارتعاش: توانائی کے اخراج سے زمین لرزتی ہے جسے زلزلہ کہتے ہیں۔
فالٹ لائن کیا ہے؟
فالٹ لائن زمین کی سطح یا زیر زمین وہ دراڑ یا شکن ہے جہاں زمینی پلیٹس یا زمین کے بڑے ٹکڑے ایک دوسرے کے مقابلے میں حرکت کرتے ہیں۔
یہ ایک طرح کا فاصلہ ہوتا ہے جس پر زمین کے ٹکڑے ایک دوسرے کے ساتھ رگڑ کھاتے یا سرک جاتے ہیں جس سے زلزلے پیدا ہو سکتے ہیں۔
فالٹ لائن پر جب زمین کے ٹکڑے اچانک حرکت کرتے ہیں تو اس سے زلزلے کے جھٹکے محسوس ہوتے ہیں۔
زلزلے کے اثرات
جانی نقصان: زیادہ شدید زلزلے عمارتیں گرا سکتے ہیں اور لوگوں کی جان جا سکتی ہے۔
معاشی نقصان: عمارتوں، سڑکوں، پلوں اور دیگر بنیادی ڈھانچوں کو نقصان پہنچتا ہے، جس سے بڑی مالی خسارہ ہوتا ہے۔
ماحولیاتی تبدیلیاں: زلزلے کی وجہ سے زمین میں دراڑیں پڑ جاتی ہیں، زمین دھنس سکتی ہے یا زمین پھٹ سکتی ہے، بعض اوقات زلزلے کی وجہ سے سونامی بھی آ سکتے ہیں، خاص طور پر سمندر کے نیچے آنے والے زلزلے۔
نفسیاتی اثرات: زلزلے کے بعد لوگوں میں خوف اور پریشانی کی کیفیت پیدا ہو سکتی ہے۔
زلزلے کی پیش گوئی
زلزلوں کی پیش گوئی بہت مشکل ہے کیونکہ یہ غیر متوقع اور اچانک ہوتے ہیں۔ سائنس دان زمین کی مسلسل حرکت کو مانیٹر کرتے ہیں، لیکن ابھی تک مکمل درست پیش گوئی ممکن نہیں ہو سکی۔
