ورلڈ چیمپیئن شپ آف لیجنڈز (ڈبلیو سی ایل) کے فائنل میں جنوبی افریقہ چیمپیئنز نے پاکستان چیمپیئنز کو شکست دے دی ہے۔
انگلینڈ میں کھیلی گئی ورلڈ چیمپیئن شپ آف لیجنڈز کے فائنل میں جنوبی افریقہ چیمپیئنز نے پاکستان کو نو وکٹوں سے شکست دے کر ٹائٹل جیت لیا ہے۔
برمنگھم کے میدان ایجبیسٹن میں کھیلے جانے والے فائنل میچ میں جنوبی افریقہ چیمپیئنز نے 196 رنز کا ہدف ایک وکٹ کے نقصان پر پورا کر لیا۔
کپتان اے بی ڈویلیئرز نے 120 رنز بنا کر ٹیم کو چیمپیئن بننے میں مدد فراہم کی، جے پی ڈومینی 50 رنز بنا کر ناٹ آؤٹ رہے۔
اے بی ڈویلیئرز کی ٹورنامنٹ میں مجموعی طور پر یہ تیسری سنچری تھی۔
ورلڈ چیمپیئن شپ آف لیجنڈز (ڈبلیو سی ایل) کے فائنل میں پاکستان چیمپیئنز نے پہلے بیٹنگ کرتے ہوئے جنوبی افریقہ چیمپیئنز کو 196 رنز کا ہدف دیا۔
پاکستان ٹیم نے ٹاس جیت کر پہلے کھیلتے ہوئے شرجیل خان کے 76 رنز کے ساتھ 195 کا سکور کیا۔
ہفتے کو برطانوی شہر برمنگھم کے ایجبیسٹن میں جاری ڈبلیو سی ایل میں پاکستان چیمپیئنز کی قیادت محمد حفیظ کر رہے ہیں جبکہ جنوبی افریقہ چیمپیئنز کے کپتان اے بی ڈیویلیئرز ہیں۔
پاکستانی ٹیم کو ایونٹ میں تاحال ناقابلِ شکست رہنے کا اعزاز حاصل ہے جبکہ سیمی فائنل میں انڈیا کی جانب سے میچ سے دستبرداری کے بعد پاکستان نے براہ راست فائنل کے لیے کوالیفائی کیا تھا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
دوسری جانب جنوبی افریقہ نے سیمی فائنل میں آسٹریلیا کو ایک سنسنی خیز مقابلے میں شکست دے کر فائنل تک رسائی حاصل کی تھی۔
ڈبلیو سی ایل ٹی20 کرکٹ فارمیٹ پر مبنی ایک ٹورنامنٹ ہے جو ہر سال انگلینڈ میں منعقد ہوتا ہے اور اسے انگلینڈ اینڈ ویلز کرکٹ بورڈ کی منظوری حاصل ہے۔
یہ ٹورنامنٹ ریٹائرڈ اور غیرکنٹریکٹ یافتہ کھلاڑیوں پر مشتمل ہوتا ہے جن کا تعلق کرکٹ کی بڑی ٹیموں جیسے پاکستان، انڈیا، انگلینڈ، آسٹریلیا، ویسٹ انڈیز اور جنوبی افریقہ سے ہوتا ہے۔
سنہ 2024 میں ڈبلیو سی ایل کا پہلا سیزن کھیلا گیا تھا، تاہم اب یہ ایونٹ دنیا بھر کے شائقین کرکٹ کی توجہ حاصل کر چکا ہے۔
اس ٹورنامنٹ میں شاہد آفریدی، یووراج سنگھ، کیون پیٹرسن، بریٹ لی، ایئن مورگن اور کرس گیل جیسے معروف سابق کرکٹرز نے شرکت کی۔
