ریسکیو حکام کے مطابق بدھ کو مری ایکسپریس وے پر کحجوٹ (کجھٹ) کے مقام پر ایک مسافر وین میں آتشزدگی کے واقعے میں اب تک چار اموات ہو چکی ہیں جبکہ متعدد افراد زخمی ہیں۔
نیشنل ہائی ویز اینڈ موٹروے پولیس کے ترجمان کے مطابق واقعے کی اطلاع ملتے ہی موٹروے پولیس کی بھاری نفری اور مری انتظامیہ جائے وقوعہ پر پہنچ گئی، جہاں امدادی اور ریسکیو کارروائیاں جاری ہیں۔
امدادی کارروائیوں میں مصروف ریسکیو حکام کے مطابق مسافر وین میں اچانک سے آگ بھڑک اٹھی تاہم اس کی وجہ تاحال واضح نہیں ہو سکی ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
دوسری جانب پنجاب ایمرجنسی سروس ریسکیو 1122 مری کے مطابق اطلاع موصول ہوتے ہی قریبی ایمبولینسز، فائر ریسکیو سروس اور دیگر ایمرجنسی وسائل کو فوری طور پر موقع پر روانہ کیا گیا۔
ریسکیو اہلکاروں نے موقع پر پہنچ کر آگ بجھانے کا عمل شروع کیا اور متاثرہ مسافروں کو ابتدائی طبی امداد فراہم کی۔
ریسکیو 1122 کے مطابق زخمیوں کو مزید علاج کے لیے سول ہسپتال مری منتقل کیا جا رہا ہے، جبکہ امدادی ٹیمیں صورتحال پر قابو پانے اور ممکنہ جانی و مالی نقصان کو کم سے کم رکھنے کے لیے سرگرم عمل ہیں۔
