بحرین کے دارالحکومت منامہ میں جمعرات کو سعودی وزیرِ خارجہ شہزادہ فیصل بن فرحان نے خلیجی تعاون کونسل اور امریکہ کے مشترکہ وزارتی اجلاس میں شرکت کی۔

اجلاس میں خطے کی صورت حال، ایران کے ساتھ جاری مذاکرات، سمندری گزرگاہوں کے تحفظ اور باہمی تعاون کے فروغ پر تبادلۂ خیال کیا گیا، شرکا میں خلیجی تعاون کونسل کے رکن ممالک کے وفود کے سربراہان، کونسل کے سیکریٹری جنرل جاسم البديوي اور امریکی وزیرِ خارجہ مارکو شامل تھے۔

شرکا نے خلیجی ممالک اور امریکہ کے درمیان تزویراتی تعلقات کا جائزہ لیتے ہوئے مختلف شعبوں میں تعاون اور شراکت داری کو مزید وسعت دینے کے طریقوں پر غور کیا۔

بحرین کے دارالحکومت منامہ میں خلیجی تعاون کونسل کے اجلاس میں شریک رہنماؤں کا گروپ فوٹو (ایس پی اے)

اجلاس میں خطے کو درپیش چیلنجز، امن و استحکام کے قیام اور خلیج عرب و مشرقِ وسطیٰ میں مشترکہ رابطوں کو مضبوط بنانے کی ضرورت پر بھی زور دیا گیا۔

اجلاس کے دوران امریکہ اور ایران کے درمیان جاری مذاکرات پر خصوصی گفتگو ہوئی۔ شرکا نے اس بات پر زور دیا کہ ان مذاکرات کے نتیجے میں سامنے آنے والے کسی بھی معاہدے یا انتظام میں خلیجی ممالک کے مفادات اور سلامتی کو مدنظر رکھا جائے اور ایسے اقدامات خطے میں پائیدار امن، خودمختاری کے احترام، حسنِ ہمسائیگی اور ممالک کے اندرونی معاملات میں عدم مداخلت کے اصولوں کو مضبوط بنائیں۔

شرکا نے سمندری راستوں کے تحفظ اور تجارتی نقل و حرکت کی آزادی کی اہمیت پر بھی زور دیا، خصوصاً آبنائے ہرمز کو علاقائی اور عالمی معیشت کے لیے ایک اہم آبی گزرگاہ قرار دیا گیا۔

اجلاس کے اختتام پر خلیجی تعاون کونسل کے رکن ممالک اور امریکہ نے مشترکہ دلچسپی کے امور پر مسلسل مشاورت جاری رکھنے اور خطے میں جامع سیاسی حل کی کوششوں کی حمایت کے عزم کا اعادہ کیا۔