ترکی کی وزارتِ خارجہ نے اتوار کو بتایا کہ ترکی، سعودی عرب اور پاکستان کے درمیان مکہ دفاعی معاہدے کی ایک کمیٹی کے مذاکرات پیر کو ریاض میں ہوں گے، جن میں ترک وزرا بھی شریک ہوں گے۔

ترک وزارتِ خارجہ کے بیان کے مطابق ’اجلاس میں خطے کی حالیہ پیش رفت اور اتحاد کو ادارہ جاتی شکل دینے کی کوششوں میں اب تک ہونے والی پیش رفت پر بات کی جائے گی۔‘

بیان میں کہا گیا ہے کہ ترک وزیرِ خارجہ حقان فیدان، وزیرِ دفاع یشار گلر اور چیف آف جنرل سٹاف جنرل سلجوق بیراکتارولو معاہدے کی سٹریٹجک سیاسی و دفاعی کمیٹی کے اجلاس میں شریک ہوں گے۔ اجلاس میں پاکستان اور سعودی عرب کے حکام بھی شرکت کریں گے۔

یمن میں سعودی عرب کی حمایت یافتہ حکومت کے سربراہ نے اتوار کو اعلان کیا کہ ایران کے حمایت یافتہ حوثیوں کے زیرِ قبضہ علاقوں پر قبضہ حاصل کرنے کے لیے بڑی فوجی کارروائی شروع کر دی گئی ہے۔

پاکستان کے وزیرِ خارجہ نے جمعے کو کہا تھا کہ حوثیوں کے حملوں کے بعد ایران نے تجویز دی تھی کہ اس گروہ کے ساتھ سیاسی سطح پر بات چیت کی جائے۔ ان کے مطابق مکہ دفاعی معاہدے کی کمیٹی اس ہفتے ریاض میں ہونے والے اجلاس میں اس تجویز پر غور کرے گی۔