سعودی عرب کی طرف سے پاکستانی آرمی چیف کے لیے اعزاز

سعودی ولی عہد شہزادہ محمد بن سلمان نے شاہ سلمان کے حکم پر عمل درآمد کرتے ہوئے جنرل قمر جاوید باجوہ کو کنگ عبدالعزیز میڈل آف ایکسیلینٹ کلاس دیا۔

سعودی عرب کے سرکاری میڈیا کے مطابق پاکستان کے آرمی چیف جنرل قمر جاوید باجوہ کو مملکت کے بانی شاہ عبدالعزیز کے نام سے منسوب ایوارڈ سے نوازا گیا ہے۔

سعودی پریس ایجنسی (ایس پی اے) نے بتایا کہ سعودی ولی عہد شہزادہ محمد بن سلمان نے شاہ سلمان کے حکم پر عمل درآمد کرتے ہوئے جنرل باجوہ کو کنگ عبدالعزیز میڈل آف ایکسیلینٹ کلاس دیا۔

ایس پی اے کے مطابق یہ میڈل ’جنرل باجوہ کی پاکستان اور سعودی عرب کے تعلقات کو مضبوط کرنے کی نمایاں کوششوں کو سراہتے ہوئے‘ دیا گیا۔

پاکستانی آرمی چیف نے ہفتے کو سعودی عرب کا دورہ کیا تھا۔ اس دورے کے دوران ان کی سعودی ولی عہد محمد بن سلمان سے ملاقات ہوئی تھی۔

ایس پی اے کے مطابق: ’ملاقات میں باہمی دلچسپی کے امور کے علاوہ دو طرفہ تعلقات، خاص طور پر عسکری شعبوں میں مواقعے کو فروغ دینے کا جائزہ لیا گیا۔‘

اس موقع پر سعودی نائب وزیر دفاع شہزادہ خالد بن سلمان بھی موجود تھے جبکہ سعودی عرب کے چیف آف جنرل سٹاف جنرل فیاض الرویلی اور دونوں اطراف کے کئی سینیئر حکام بھی موجود تھے۔

زیادہ پڑھی جانے والی پاکستان