پاکستان میں مرکزی رویت ہلال کمیٹی کے چیئرمین مولانا عبدالخبیر آزاد نے اعلان کیا ہے کہ ملک شوال کا چاند نظر نہیں آیا لہذا عید الفطر ہفتہ 22 اپریل کو ہو گی۔

ماہ شوال کا چاند دیکھنے کے لیے مرکزی رویت ہلال کمیٹی کا اجلاس جمعرات کو اسلام آباد میں منعقد ہوا۔

اجلاس کے بعد پریس کانفرنس کرتے ہوئے مولانا عبداخبیر آزاد نے کہا کہ پاکستان کے بیشتر علاقوں میں مطلع صاف رہا جبکہ چند مقامات پر مطلع ابر آلود رہا۔

انہوں نے کہا کہ پاکستان کے کسی بھی مقام سے شوال کا چاند نظر آنے کی کوئی شہادت موصول نہیں ہوئی۔

مرکزی رویت ہلال کمیٹی کے چیئرمین نے اعلان کیا کہ ’لہذا اتفاق رائے سے فیصلہ کیا گیا کہ یکم شوال 22 اپریل بروز ہفتہ کو ہو گی۔‘

ماضی میں مختلف موقعوں پر مرکزی رویت ہلال کمیٹی سے علیحدہ پشاور کی مشہور مسجد قاسم علی خان میں اجلاس منعقد کر کے چاند دیکھنے اور عید کا اعلان کرنے والے مفتی پوپلزئی نے آج ٹوئٹر پر بتایا کہ کل 30واں روزہ رکھا جائے گا۔

اس اعلان کے کچھ دیر بعد شمالی وزیرستان سے رکن قومی اسمبلی محسن داوڑ نے ٹوئٹر پر کہا کہ شمالی وزیرستان میں شوال کا چاند نظر آنے کے بعد کل بروز جمعہ عید منائی جائے گی۔

اس سے قبل پاکستان کے محکمہ موسمیات نے بھی بتایا تھا کہ پاکستان میں جمعرات کو چاند نظر آنے کے امکانات تقریباً نہ ہونے کے برابر ہیں۔

دوسری جانب سعودی گزٹ کے مطابق سعودی عرب میں شوال کا چاند نظر آ گیا ہے جس کے بعد عید الفطر جمعہ 21 اپریل کو ہوگی۔

اس کے علاوہ متحدہ عرب امارات اور ترکی میں بھی شوال کا چاند نظر آ گیا ہے۔