انڈونیشیا کے صدر پرابووو سوبیانتو پاکستان کے دو روزہ سرکاری دورے پر آج پیر کو اسلام آباد پہنچیں گے۔
اتوار کو جاری ہونے والے دفتر خارجہ کے بیان کے مطابق وزیر اعظم شہباز شریف نے انڈونیشیا کے صدر کو پاکستان کا دورہ کرنے کی دعوت دی ہے۔ وزرا اور سینیئر حکام پر مشتمل اعلیٰ سطح کا وفد بھی انڈونیشیا کے صدر کے ساتھ ہو گا۔
دفتر خارجہ کے مطابق یہ صدر پرابووو کا یہ پہلا دورہ پاکستان ہے۔ انڈونیشیا کی جانب سے آخری صدارتی دورہ 2018 میں صدر جوکو ویڈوڈو نے کیا تھا۔
دفتر خارجہ کا کہنا ہے کہ ’انڈونیشیا کے صدر کا دورہ خاص اہمیت کا حامل ہے ہے کیوں کہ یہ پاکستان اور انڈونیشیا کے درمیان سفارتی تعلقات کے قیام کی 75ویں سالگرہ کے موقع پر ہو رہا ہے۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
انڈونیشیا کے صدر پرابووو سوبیانتو پاکستان میں قیام کے دوران وزیر اعظم شہباز شریف کے ساتھ وفود کی سطح پر مذاکرات کریں گے۔
وہ صدر آصف علی زرداری، آرمی چیف اور چیف آف ڈیفنس فورسز فیلڈ مارشل سید عاصم منیر سے بھی ملاقاتیں کریں گے۔
دفتر خارجہ نے اپنے بیان میں مزید بتایا ہے کہ دونوں ممالک کے درمیان بات چیت کا دائرہ کار وسیع ہو گا جس میں پاکستان انڈونیشیا تعلقات کو مزید مضبوط بنانے اور تعاون کے نئے مواقع تلاش کرنے پر بات ہو گی جن میں تجارت، سرمایہ کاری، دفاع، صحت، آئی ٹی، ماحولیات، تعلیم اور ثقافت کے شعبے شامل ہیں۔
اس کے علاوہ علاقائی اور عالمی سطح پر تعاون بڑھانے پر بھی تبادلہ خیال کیا جائے گا۔ انڈونیشیا کے صدر دورے کے دوران مفاہمت کی متعدد یادداشتوں پر دستخط کی توقع ہے۔
دفتر خارجہ کا کہنا ہے پاکستان اور انڈونیشیا کے درمیان قریبی، خوشگوار اور دیرینہ تعلقات موجود ہیں جو مشترکہ اقدار اور باہمی مفادات پر قائم ہیں۔ صدر پرابووو کا دورہ دو ممالک کے درمیان دوطرفہ تعلقات کو مزید گہرا کرنے اور دوطرفہ مفاد میں تعاون کو فروغ دینے کا ایک اہم موقع فراہم کرے گا اور شراکت داری کے تسلسل کے استحکام اور وسعت میں مددگار ثابت ہوگا۔
