وزیر اعظم شہباز شریف نے بدھ کو سعودی ولی عہد اور وزیر اعظم شہزادہ محمد بن سلمان سے ٹیلیفون پر علاقائی صورت حال پر تبادلہ خیال کیا ہے۔

وزیر اعظم ہاؤس سے جاری بیان کے مطابق وزیر اعظم نے ’نہایت گرمجوش اور خوشگوار گفتگو کے دوران خادم حرمین شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان کے لیے اپنے احترام اور نیک تمناؤں کا اظہار کیا۔‘

بیان میں بتایا گیا کہ وزیر اعظم نے پاکستان کے لیے شہزادہ محمد بن سلمان کی محبت، خلوص اور گرمجوشی پر ان کا شکریہ ادا کیا۔ 

’دونوں رہنماؤں نے اس امر کا اعادہ کیا کہ حالیہ مہینوں میں نئی بلندیوں کو چھونے والے دیرینہ اور برادرانہ تعلقات کو مزید مضبوط کیا جائے گا۔‘

بیان کے مطابق دونوں رہنماؤں نے علاقائی صورتحال اور موجودہ پیش رفت پر بھی تبادلہ خیال کیا.

’وزیر اعظم نے مختلف چیلنجز کے تناظر میں امت مسلمہ کے درمیان اتحاد اور ہم آہنگی برقرار رکھنے کی ضرورت پر زور دیا۔ ‘

بیان میں کہا گیا کہ سعودی عرب کے ساتھ پاکستان کی مکمل یکجہتی کا اظہار کرتے ہوئے وزیر اعظم نے کہا کہ بات چیت اور سفارت کاری کے ذریعے علاقائی امن و استحکام کو برقرار رکھنا ناگزیر ہے۔

ولی عہد شہزادہ محمد بن سلمان نے ٹیلیفونک رابطے پر وزیر اعظم کا شکریہ ادا کیا اور پاکستان کے ساتھ باہمی دلچسپی کے تمام شعبوں میں تعاون کو مزید فروغ دینے کی مملکت کی خواہش کا اعادہ کیا۔ 

انہوں نے آئندہ برس پاکستان کا سرکاری دورہ کرنے کی خواہش کا بھی اظہار کیا.

شہباز شریف نے اس سے قبل آج اسلام آباد میں سعودی سفیر نواف بن سعید احمد المالکی سے ملاقات میں دونوں ملکوں کے درمیان دوطرفہ تعلقات پر اطمینان کا اظہار کیا۔

وزیر اعظم ہاؤس سے جاری بیان میں کہا گیا کہ شہباز شریف نے دونوں ملکوں میں ’دیرینہ برادرانہ تعلقات کو مزید گہرا کرنے کے لیے اپنے مضبوط عزم کا اعادہ کیا۔‘

 انہوں نے ولی عہد شہزادہ محمد بن سلمان کا پاکستان کی حمایت پر شکریہ ادا کیا جس کی بدولت دونوں ممالک ایک دوسرے کے مزید قریب آئے۔

بیان کے مطابق وزیر اعظم نے اس سال کے دوران ولی عہد کے ساتھ اپنی ملاقاتوں کا ذکر کیا جو انتہائی نتیجہ خیز رہی تھیں اور پاک سعودی دوطرفہ تعلقات کو نئی سطحوں تک پہنچانے میں اہم کردار ادا کیا۔

انہوں نے ضرورت کے وقت سعودی عرب کی جانب سے پاکستان کی مسلسل حمایت اور علاقائی امن و استحکام کے فروغ میں اس کے تعمیری کردار کو بھی سراہا۔‘

ملاقات میں حالیہ علاقائی اور عالمی پیش رفت پر بھی تبادلہ خیال کیا گیا۔ وزیراعظم نے مذاکرات اور سفارت کاری کے ذریعے امن و استحکام کو برقرار رکھنے کی ضرورت پر زور دیا۔

سعودی سفیر نے شاہ سلمان بن عبدالعزیز آل سعود اور ولی عہد شہزادہ محمد بن سلمان کی جانب سے وزیراعظم کو تہنیتی پیغام پہنچایا۔

انہوں نے سعودی عرب کی پاکستان کے ساتھ باہمی دلچسپی کے تمام شعبوں میں تعاون بڑھانے کی خواہش کا اعادہ کیا۔