پاکستان کرکٹ بورڈ (پی سی بی) نے اتوار کو آئی سی سی مینز ٹی ٹوئنٹی ورلڈ کپ 2026 کے لیے 15 رکنی سکواڈ کا اعلان کر دیا ہے۔ سلمان علی آغا ٹیم کے کپتان ہوں گے۔
ٹی ٹوئنٹی ورلڈ کپ کا آغاز سات فروری سے ہو رہا ہے، جس کی میزبانی انڈیا اور سری لنکا مشترکہ طور پر کر رہے ہیں۔ پاکستان کو گروپ اے میں شامل کیا گیا ہے اور وہ اپنا پہلا میچ سات فروری کو کولمبو میں نیدرلینڈز کے خلاف کھیلے گا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
اتوار کو قذافی سٹیڈیم لاہور میں پی سی بی کے ڈائریکٹر ہائی پرفارمنس اور قومی سلیکشن کمیٹی کے رکن عاقب جاوید، پاکستان کے ٹی ٹوئنٹی کپتان سلمان علی آغا اور وائٹ بال ہیڈ کوچ مائیکل جیمز ہیسن نے پریس کانفرنس کے دوران سکواڈ کا اعلان کیا۔
پی سی بی کے مطابق ٹورنامنٹ کھیلنے والے کھلاڑیوں میں کپتان سلمان علی آغا، فہیم اشرف، خواجہ محمد نافع، محمد سلمان مرزا اور صاحبزادہ فرحان شامل ہیں جب کہ عثمان طارق کو پہلی بار کسی بڑے ٹورنامنٹ کے لیے پاکستانی سکواڈ میں شامل کیا گیا ہے۔
دوسری جانب سکواڈ میں شامل ابرار احمد، بابر اعظم، فخر زمان، محمد نواز، نسیم شاہ، صائم ایوب، شاہین شاہ آفریدی، شاداب خان اور عثمان خان 2021 سے اب تک اس ٹورنامنٹ کے کم از کم ایک یا اس سے زیادہ ایڈیشنز کھیل چکے ہیں۔
20 ٹیموں پر مشتمل اس ٹورنامنٹ میں ہر ٹیم سپر ایٹ اور ناک آؤٹ مرحلے سے قبل چار گروپ میچ کھیلے گی اور یہ تمام مقابلے سات فروری سے آٹھ مارچ کے درمیان ہوں گے۔
پاکستان 29 اور31 جنوری اور یکم فروری کو قذافی سٹیڈیم لاہور میں تین ٹی ٹوئنٹی میچوں کی سیریز میں آسٹریلیا کا سامنا بھی کرے گا، جس کے لیے تربیتی کیمپ آج سے شروع ہو رہا ہے۔
