پاکستان انٹرنیشنل ائرلائنز (پی ائی اے) کی پہلی پرواز پی کے 785 تین سو سے زائد مسافروں کے ساتھ اسلام آباد سے اتوار کو لندن روانہ ہوگئی۔
پی ائی اے کی پرواز کو سیکریٹری دفاع لیفٹیننٹ جنرل (ر) محمد علی اور برطانوی ہائی کمشنر جین میریٹ نے الوداع کیا۔
افتتاحی پرواز کی تقریب میں کیک بھی کاٹا گیا اور قرعہ اندازی کے ذریعے ایک 660 سی سی گاڑی بھی ایک خوش نصیب مسافر کے نام نکالی گئی جبکہ دیگر مسافروں کو بھی تحائف پیش کیے گئے۔
اسلام آباد ائرپورٹ پر پرواز کی روانگی سے قبل ایک تقریب کا انعقاد کیا گیا جس میں پی آئی اے کنسورشیئم کے چیئرمین عارف حبیب اور ہوا بازی کے اعلی حکام نے شرکت کی۔
تقریب سے خطاب کرتے ہوئے سیکریڑی ڈیفنس نے کہا کہ یہ پرواز دونوں ملکوں اور لوگوں کے مابین تعلقات کو مزید مستحکم کرے گی۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
برطانوی ہائی کمشنر جین میریٹ نے پی آئی اے کو لندن آپریشن پر مبارک باد دی۔
پی آئی اے کا کہنا ہے کہ وہ برطانیہ میں مقیم 16 لاکھ سے زائد پاکستانیوں کو براہ راست سفری سہولیات کی فراہمی کے لیے پر عزم ہے۔
تقریب کے مہمانان گرامی کو چیف ایگزیکٹو آفیسر پی آئی اے کی جانب سے یادگاری شیلڈز پیش کی گئیں۔
پی آئی اے 30 مارچ سے لاہور سے لندن کے لیے بھی ہفتہ وار پرواز کا آغاز کر رہی ہے۔
پی آئی اے پاکستان اور لندن کے مابین ابتدائی طور پر چار ہفتہ وار پروازیں چلائے گی جس میں تین اسلام آباد اور ایک لاہور کے لیے آپریٹ ہوں گی۔
لندن پی آئی اے کی پہلی بین اقوامی منزل تھی اور پی آئی اے کا اس روٹ سے 71 سال پرانا رشتہ ہے۔
