پاکستان کے نائب وزیر اعظم و وزیر خارجہ اسحاق ڈار اتوار کو مصری وزیر خارجہ کے استقبال کے دوران پھسل کر گر گئے جس کے بعد ان کے بیٹے نے رات گئے ایکس پر ایک پوسٹ میں بتایا کہ ان کے والد کو ’کندھے میں ہیئر لائن فریکچر ہے۔‘

اسلام آباد میں سعودی عرب، ترکی اور مصر کے وزرائے خارجہ کے اجلاس کی میزبانی کے دوران اتوار کو جب مصر کے وزیر خارجہ ڈاکٹر بدر عبد العاطی وزارت خارجہ پہنچے تو استقبال کے موقعے پر اسحاق ڈار پھسل کر گر گئے۔

تاہم وہ فوراً ہی کھڑے ہو گئے اور معمول کے مطابق سٹیج پر مصری وزیر خارجہ کے ساتھ تصاویر بنوائیں۔

نائب وزیراعظم کے بیٹے علی ڈار نے اتوار کو دیر گئے ’ایکس‘ پر ایک پوسٹ میں کہا ’اسحاق ڈار صاحب نے آج مصر کے وزیر خارجہ کے استقبال کے دوران چوٹ لگنے کے باوجود پورا دن پین کلرز لے کر انتہائی اہمیت کی حامل تمام میٹنگز الحمدللہ احسن طریقے سے مکمل کیں۔‘

علی کے مطابق ان کے والد نے اتوار کی رات تقریباً نو بجے سرکاری بیان کی ریکارڈنگ اور پاکستان کے لیے ایک بڑے دن کے بہترین اختتام کے بعد فیملی کے اصرار پر طبی معائنہ کروایا۔

’ان کے x-rays الحمدللہ مجموعی طور پر ٹھیک ہیں۔ کندھے میں ایک ہیئر لائین فریکچر ہے۔ اگلے چند روز ان کی درد کو دوائیوں اور دیگر احتیاطی اقدامات کے ذریعے مینج کیا جائے گا ۔‘

پاکستان اور دیگر مسلم ممالک امریکہ اور اسرائیل کی ایران سے جنگ کے خاتمے کے لیے کوششوں میں مصروف ہیں اور اسحاق ڈار اس سلسلے میں ایک فعال کردار ادا کر رہے ہیں۔

اس ضمن میں پاکستان نے ترکی، سعودی عرب اور مصر کے وزرائے خارجہ کی اسلام آباد میں میزبانی کی۔