اسلام آباد کے سینیئر سفارتی امور کے ماہر باقر سجاد سید کہتے ہیں کہ ان مذاکرات سے پاکستان اور مسلم دنیا دونوں کو فائدہ ہوگا۔

انڈپینڈنٹ اردو کے ساتھ ایک انٹرویو میں انہوں نے یہ بات کی۔ کیا یہ سفارتی کوشش واقعی جنگ بندی کی طرف پیش رفت ہے یا یہ محض ایک علامتی اقدام ہے؟

 اس سمیت کئی اہم سوالات کے جوابات ڈھونڈنے کے لیے انڈپینڈنٹ اردو نے خارجہ امور پر گہری نگاہ رکھنے والے صحافی باقر سجاد سید سے گفتگو کی ہے۔

ایران کے خلاف جنگ کو ایک ماہ ہو چلا ہے جس دورسان فریقین کی جانب سے ایک دوسرے کے فوجی اور اہم مقامات کو نشانہ بنانے کے اعلان کیے جا رہے ہیں وہیں دوسری جانب علاقائی ممالک جیسے سعودی عرب، پاکستان، مصر اور ترکی کی جانب سے سفارتی کوششیں بھی جاری ہیں۔

پاکستان ایران اور امریکہ کے درمیان ثالثی کا کردار ادا کر رہا ہے۔ اور پس پردہ سفارت کاری کے ذریعے پیغامات کے تبادلے کا سلسلہ جاری ہے۔

اس صورت حال میں اسلام آباد میں ہونے والے حالیہ سفارتی رابطے اور وزرائے خارجہ سطح کے اجلاس کو اہم پیش رفت قرار دیا جا رہا ہے، تاہم امریکہ اور ایران کی براہ راست عدم شمولیت کی وجہ سے اس عمل کی افادیت پر بات کی جا رہی ہے۔

پاکستان اپنی ایران اور سعودی عرب دونوں کے ساتھ قریبی تعلقات کے باعث ایک متوازن کردار ادا کرنے کی کوشش کر رہا ہے جبکہ خطے میں جنگ کے پھیلاؤ کے خدشات اس کوشش کو مزید اہم بنا رہے ہیں۔