امریکی صدر ڈونلڈ ٹرمپ اس ہفتے کے آخر میں بہاماس میں ہونے والی اپنے بڑے بیٹے کی شادی میں شرکت نہیں کریں گے۔
جمعرات کو صحافیوں سے گفتگو میں انہوں نے کہا تھا کہ وہ ڈونلڈ ٹرمپ جونیئر اور بیٹینا اینڈرسن کی اس نجی تقریب میں شرکت کی ’کوشش کریں گے‘، تاہم انہوں نے یہ بھی کہا کہ ایران کی جنگ کے باعث ’وقت مناسب نہیں ہے‘۔
بعد ازاں سی این این کے مطابق ذرائع نے تصدیق کی کہ صدر نے شادی میں شرکت نہ کرنے کا فیصلہ کیا ہے۔
ٹرمپ نے اوول آفس میں صحافیوں کے سوال پر کہا: ’یہ وہ چیز ہے جس میں، میں نہیں جیت سکتا۔ اگر میں جاؤں تو بھی تنقید ہوگی اور اگر نہ جاؤں تو بھی مجھے فیک نیوز کے ذریعے نشانہ بنایا جائے گا۔‘
ان کے ویک اینڈ شیڈول کے مطابق صدر امریکہ میں ہی رہیں گے اور نیو جرسی کے بیڈ منسٹر میں غالباً اپنے گالف کلب میں ’ایگزیکٹو ٹائم‘ گزاریں گے۔
ذرائع کے مطابق ڈونلڈ ٹرمپ جونیئر اور اینڈرسن کی شادی ایک انتہائی نجی تقریب ہوگی، جس میں 50 سے کم مہمان شریک ہوں گے۔ صدر نے بھی اسے ’چھوٹی اور نجی تقریب‘ قرار دیا تھا۔
سی این این کے مطابق ایک وجہ یہ بھی تھی کہ صدر اس تقریب کو زیادہ سے زیادہ نجی رکھنا چاہتے تھے، اسی لیے ان کی عدم شرکت کا فیصلہ کیا گیا۔
جمعرات کو اس بارے میں سوال پر صدر نے غیر واضح جواب دیا تھا اور کہا تھا کہ انہیں ایران کی جنگ کی صورت حال کے باعث موجود رہنا ہوگا۔
انہوں نے کہا: ’وہ چاہتے ہیں کہ میں جاؤں۔ میں نے کہا، یہ میرے لیے اچھا وقت نہیں ہے، میرے پاس ایران اور دیگر معاملات ہیں۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
تقریباً 12 ہفتے گزرنے کے باوجود ایران کی جنگ جاری ہے اور ٹرمپ کو عوامی سطح پر بڑھتی ہوئی ناپسندیدگی کا سامنا ہے، جس کی وجہ مہنگائی، پیٹرول، اشیائے خورونوش اور روزمرہ اخراجات میں اضافہ بتایا جا رہا ہے، جو اس جنگ سے متاثر ہوئے ہیں۔
اس کے باوجود، ٹرمپ گالف ٹریک کے مطابق وہ جنگ کے آغاز کے بعد کم از کم پانچ ویک اینڈ مارا لاگو میں اپنے گالف کلب میں گزار چکے ہیں اور کم از کم تین ویک اینڈ ڈورل، فلوریڈا میں بھی رہے ہیں، جہاں انہوں نے کئی مواقع پر گالف بھی کھیلا۔
اب وہ نیو جرسی میں وقت گزارنے کا ارادہ رکھتے ہیں۔
دیگر صدور اپنے اہلِ خانہ کی شادیوں میں شرکت کرتے رہے ہیں، اور بعض نے ان کی میزبانی بھی کی ہے۔ حال ہی میں سابق صدر جو بائیڈن نے نومبر 2022 میں اپنی نواسی نومی بائیڈن کی شادی وائٹ ہاؤس میں کروائی تھی، جبکہ سابق صدر جارج ڈبلیو بش نے جون 2008 میں اپنی بیٹی جینا بش ہیگر کی شادی کی تقریب وائٹ ہاؤس میں منعقد کی تھی۔
ڈونلڈ ٹرمپ جونیئر کی یہ شادی ان کی دوسری شادی اور تیسری منگنی ہوگی۔
صدر کے بیٹے کی پہلی شادی وینیسا ٹرمپ سے ہوئی تھی جن سے ان کے پانچ بچے ہیں، اور وہ پہلے کمبرلی گِلفوئل سے بھی منگنی کر چکے ہیں، جو اس وقت یونان میں سفیر کے طور پر خدمات انجام دے رہی ہیں۔
47 سالہ ٹرمپ جونیئر نے 2024 میں 39 سالہ اینڈرسن کو ڈیٹ کرنا شروع کیا تھا اور دسمبر 2025 میں دونوں کی منگنی ہوئی۔ سی این این کے مطابق صدر نے خود ایک وائٹ ہاؤس ہالیڈے پارٹی میں اس منگنی کا اعلان کیا تھا۔
صدر نے جمعرات کو شادی سے متعلق گفتگو میں اینڈرسن کو ’ایک شخصیت جسے میں طویل عرصے سے جانتا ہوں‘ قرار دیا۔
انہوں نے کہا: ’امید ہے ان کی شادی بہت اچھی ہوگی۔‘
© The Independent
