وسکونسن کا ایک جھیل کنارے واقع شہر نئے رہائشیوں کو اپنی طرف متوجہ کرنے کے لیے انہیں وہاں منتقل ہونے اور کمیونٹی میں حصہ ڈالنے کے بدلے میں 9,500 ڈالر تک دینے کی پیشکش کر رہا ہے۔

فون ڈو لاک (Fond du Lac)، جو وسکونسن میں لیک ونیباگو کے جنوبی کنارے پر واقع ہے، ایک 1930 کی دہائی کے لائٹ ہاؤس کا گھر ہے اور اپنی سڑکوں کو آباد کرنے کے لیے کچھ نئے باشندوں کی تلاش میں ہے۔

شہر کی موجودہ آبادی تقریباً 44,000 افراد پر مشتمل ہے۔ ایک سرکاری پریس ریلیز کے مطابق یہ شہر نئے رہائشیوں کو نقل مکانی کے اخراجات اور مقامی ضروریات کے لیے 5,500 ڈالر سے لے کر مجموعی طور پر 9,500 ڈالر تک کی مالی امداد فراہم کر رہا ہے۔

فون ڈو لاک نے ایک ادارے ’میک مائی موو‘ کے ساتھ شراکت کی ہے، جو ایسے امریکیوں کو ان کمیونٹیز سے جوڑنے میں مدد دیتا ہے جہاں وہ شاید پہلے سے واقف نہ ہوں یا جن پر انہوں نے غور نہ کیا ہو۔

یہ پروگرام سائننگ بونس، مراعات اور نیٹ ورکنگ کے مواقع کے ذریعے لوگوں کو ان علاقوں میں منتقل ہونے کی ترغیب دیتا ہے جہاں آبادی بڑھانے کی ضرورت ہوتی ہے۔

اس سے قبل بلومنگٹن (انڈیانا)، سیلینا (کینساس) اور ٹیکساس کے شہر ٹیکرکانا جیسے شہر بھی اس پروگرام کے ساتھ کام کر چکے ہیں۔

پروگرام کی ویب سائٹ کے مطابق یہ سروس لوگوں کو ’اپنی خوشی کی جگہ تلاش کرنے اور وہاں منتقل ہو کر پیسے کمانے‘ میں مدد دیتی ہے۔

وسکونسن کے اس شہر میں منتقل ہونے کے خواہش مند افراد کو 5,500 ڈالر نقل مکانی کے اخراجات کے لیے دیے جائیں گے جبکہ اضافی سہولیات میں وائی ایم سی اے کی ممبرشپ، مقامی بیس بال کے تجربات، گالف پیکجز، آرٹس ایونٹس تک رسائی، مقامی ریستورانوں کی سہولیات اور خاندانی سرگرمیاں شامل ہیں۔

یہ کمیونٹی اپنی کم ہوتی ورک فورس اور عمر رسیدہ آبادی کے مسئلے سے نمٹنے کے لیے نئے رہائشیوں کو راغب کرنا چاہتی ہے۔

پریس ریلیز میں کہا گیا ’فون ڈو لاک اپنی خصوصیات کو اجاگر کر رہا ہے، جن میں قومی سطح پر تسلیم شدہ تعلیمی بہتری، مضبوط مقامی آجر، سستی رہائش، جھیل کنارے سہولیات اور خاندانی سرگرمیوں کی وسیع رینج شامل ہے۔‘

ان مراعات کے علاوہ منتظمین نے اس بات پر بھی زور دیا کہ شہر کی لیک ونیباگو کے قریب موجودگی پانی سے متعلق سرگرمیوں کے شوقین افراد کے لیے بہترین ہے۔

بیان کے مطابق’یہاں کے محلے ساحل کے اتنے قریب ہیں کہ ماہی گیری، ونڈ سرفنگ، سیلنگ اور آئس سکیٹنگ روزمرہ زندگی کا حصہ بن جاتے ہیں۔‘

شہر ہر سال ’Sturgeon Spectacular‘ نامی ایونٹ بھی منعقد کرتا ہے، جس میں ’برف کے نیچے مچھلیوں کے شکار کے تین دن، ریاستی برف مجسمہ سازی کا مقابلہ شامل ہوتا ہے۔

اس پروگرام میں دلچسپی رکھنے والے افراد مقامی کوآرڈینیٹرز کے ذریعے درخواست دے سکتے ہیں۔

میک مائی موو کے علاوہ اس مراعاتی پروگرام کو وسکونسن اکنامک ڈیولپمنٹ کارپوریشن اور انویژن گریٹر فون ڈو لاک کی بھی سپورٹ حاصل ہے۔

پریس ریلیز میں کہا گیا ’یہ پروگرام ان لوگوں کے لیے ہے جو مستحکم اور بامعنی ذاتی طور پر کیے جانے والے کام کے خواہاں ہیں اور ایسے کمیونٹی میں زندگی بنانے کا موقع چاہتے ہیں جو واقعی اپنے رہائشیوں اور ورک فورس کی قدر کرتی ہے۔‘