’ہمیں ٹروڈو کی داڑھی کا جواب چاہیے‘

کینیڈین وزیراعظم جسٹن ٹروڈو کو لوگوں نے زیادہ تر کلین شیو ہی دیکھا ہے، یہی وجہ ہے کہ ان کی نئی تصویر کے سوشل میڈیا پر چرچے ہیں۔

سوشل میڈیا صارفین جہاں وزیراعظم جسٹن ٹروڈو کے اس انداز کو سراہ رہے ہیں، وہیں کچھ دلچسپ تبصرے بھی سامنے آرہے ہیں۔ (تصویر: ایڈم سکاٹی  انسٹاگرام اکاؤنٹ )

کینیڈا کے وزیراعظم جسٹن ٹروڈو اپنے انداز اور پرکشش شخصیت کے باعث اکثر وبیشتر خبروں کا مرکز بنے رہتے ہیں، لیکن اس مرتبہ سوشل میڈیا پر ان کی ’داڑھی‘ کے چرچے ہیں۔

جسٹن ٹروڈو کے آفیشل فوٹوگرافر ایڈم سکاٹی کی کھینچی ہوئی ایک تصویر سوشل میڈیا پر وائرل ہے، جس میں ہلکی داڑھی کے ساتھ وہ کافی سنجیدہ نظر آرہے ہیں، لیکن کینیڈا کے لوگوں کو اس میں بھی کشش نظر آئی اور انہوں نے #trudeaubeard (ٹروڈو کی داڑھی) کے ہیش ٹیگ کے ساتھ دھڑا دھڑ ٹویٹس شروع کردیں۔

مزید پڑھ

اس سیکشن میں متعلقہ حوالہ پوائنٹس شامل ہیں (Related Nodes field)

48 سالہ ٹروڈو کو لوگوں نے زیادہ تر کلین شیو ہی دیکھا ہے، یہی وجہ ہے کہ کچھ نے سوال کیا: ’ہمیں داڑھی کا جواب چاہیے۔‘ تاہم اب تک وزیراعظم کے دفتر کی جانب سے اس کا کوئی جواب نہیں دیا گیا اور نہ ہی اس بارے میں کوئی مصدقہ بات سامنے آئی کہ جسٹن ٹروڈو اب اسی روپ میں نظر آئیں گے یا پرانے روپ میں واپس آجائیں گے۔

سوشل میڈیا صارفین جہاں وزیراعظم جسٹن ٹروڈو کے اس انداز کو سراہ رہے ہیں، وہیں کچھ دلچسپ تبصرے بھی سامنے آرہے ہیں۔

صحافی برائن پلاٹ نے لکھا: ’میکینزی بوول (96-1894) کے بعد سے ٹروڈو پہلے وزیراعظم ہیں، جنہوں نے مکمل داڑھی رکھی ہے۔‘

تاہم لوگوں نے ان کا مذاق اڑاتے  ہوئے سوال کیا: ’کیا یہ مکمل داڑھی ہے؟‘

ایک صارف نے لکھا: ’ادھر دنیا بکھر رہی ہے  اور یہاں کینیڈا کو ٹروڈو کی داڑھی کی پڑی ہے۔‘

حمزہ خان نامی صارف نے لکھا: ’جسٹن ٹروڈو یہاں مڈل کلاس والوں کے وزیراعظم لگ رہے ہیں۔‘

ایک صارف نے طنز کرتے ہوئے لکھا: ’کیا کینیڈین سیاسی طور پر اتنے بور ہوگئے ہیں کہ انہیں جسٹن ٹروڈو کی داڑھی سے متعلق پیش ٹیگ بنانا پڑ گیا۔‘

سارہ نامی ایک صارف نے لکھا: ’ہمارے وزیراعظم ایسے کیوں لگ رہے ہیں جیسے امتحان کے دنوں میں یونیورسٹی طلبہ لگتے ہیں؟ مجھے جواب چاہیے۔‘

کسی نے لکھا: ’میں اپنے امریکی دوستوں کا شکریہ ادا کرنا چاہتا ہوں کہ ہم کینیڈین کتنے خوش قسمت ہیں کہ ہمارے وزیراعظم صرف داڑھی بڑھانے کی وجہ سے ٹوئٹر پر ٹرینڈ کر رہے ہیں۔‘

 

زیادہ پڑھی جانے والی ٹرینڈنگ