چیئرمین اسلامی ترقیاتی بینک ڈاکٹر محمد سلیمان الجاسر نے کہا ہے کہ پاکستان ان کے بینک سے قرض لینے والا دوسرا بڑا ملک ہے اور گذشتہ سالوں میں اسے ملنے والی مالیات کا ہجم ساڑھے 14 ارب ڈالر بنتا ہے۔

عرب نیوز کو دیے گئے ایک خصوصی انٹرویو میں ڈاکٹر الجاسر کا کہنا تھا: ’جو رقم مجھے یاد پڑتی ہے وہ ساڑھے 14 ارب ڈالر ہے جو گذشتہ سالوں تک پاکستان کو فراہم کی گئی اور پاکستان اسلامی ترقیاتی بینک سے قرض لینے والا دوسرا بڑا ملک ہے۔‘

انٹرویو میں ڈاکٹر الجاسر نے پاکستان میں ہونے والی بنیادی ڈھانچے کی ترقیات کو متاثر کن قرار دیا۔ ان کا کہنا تھا کہ ’انفراسٹرکچر کی جو ترقی ہو رہی ہے اس سے میں بہت متاثر ہوا ہوں۔‘

ڈاکٹر الجاسر نے کہا کہ اسلامی ترقیاتی فنڈ مہمند ڈیم کے لیے مالیات کی فراہمی ممکن بنائے گا۔ انہوں نے بتایا کہ پاکستان اور بینک کے درمیان مہمند ڈیم کی تعمیر کے لیے 18 کروڑ ڈالر کی فراہمی کے لیے معاہدے پر دستخط ہوئے ہیں۔ 

افغانستان کے حوالے سے بات کرتے ہوئے اسلامی ترقیاتی بینک کے چیئرمین ڈاکٹر محمد سلیمان الجاسر کا کہنا تھا: ’ہم نے کل ایک چارٹر سائن کیا تھا جس کے تحت بننے والے ہیومینی ٹیرین ٹرسٹ فنڈ کے انتظامات دیکھے جائیں گے اور افغان عوام کی فوری ضروریات کے لیے مالیات کی فراہمی ممکن بنائی جائے گی۔‘

ڈاکٹر الجاسر نے امید ظاہر کی کہ جب ’بنیادی ضروریات‘ پوری ہو جائیں گی تو یہ فنڈ ’مزید آگے‘ جائے گا۔

اس فنڈ کے مستقبل کے حوالے سے اپنی امید کا اظہار کرتے ہوئے ڈاکٹر الجاسر کا کہنا تھا: ’میں بہت پر امید ہوں کیوں کہ او آئی سی نے یہ فنڈ بنایا ہے اور او آئی سی کا ماضی اپنے وعدوں کو نبھانے کے حوالے سے بہت اچھا ہے۔‘

یاد رہے کہ اسلامی ترقیاتی بینک بطور ممبر اسلامی سربراہی کانفرنس کا حصہ ہے اور اس کے چیئرمین ڈاکٹر سلیمان محمد سلیمان الجاسر اسلامی سربراہی کانفرنس کے وزرائے خارجہ کی کانفرنس میں شرکت کے لیے اسلام آباد میں موجود تھے۔