بابر اعظم پاکستان کا ’ستارہ امتیاز‘

پاکستان کی قومی کرکٹ ٹیم کے کپتان اور سٹار بلے باز بابر اعظم کرکٹ کی دنیا میں اپنی شاندار پرفارمنس سے جہاں کئی فتوحات اور کئی ریکارڈ اپنے نام کر چکے ہیں، وہیں انہیں اب پاکستان کے اعلیٰ سول اعزاز ’ستارۂ امتیاز‘ سے بھی نوازا جا رہا ہے۔

23 مارچ کو پاکستان کے قومی دن کے موقعے پر بابر اعظم کے متعدد عالمی ریکارڈز کی فہرست میں ایک اور اعزاز بھی شامل ہو جائے گا۔ 

بابر اعظم کو بطور کپتان اور بہترین کارکردگی کا مظاہرہ کرنے والے بلےباز کے طور پر اور پاکستان کی کرکٹ میں ان کی نمایاں خدمات کے لیے اس باوقار سول ایوارڈ سے نوازا جائے گا۔

ایسوسی ایٹڈ پریس پاکستان کے مطابق بابر اعظم کو سول ایوارڈ سے نوازنے کا اعلان گذشتہ سال 14 اگست کے موقعے پر کیا گیا تھا اور اب یوم پاکستان کی تقریب یعنی 23 مارچ کو انہیں اس ایوارڈ سے نوازا جائے گا۔ 

سوشل میڈیا پر بھی بابر اعظم کو ستارۂ امتیاز دینے کی خبر کا ٹاپ ٹرینڈ بن گیا ہے اور مداحوں نے اپنے پسندیدہ کھلاڑی کو سول ایوارڈ سے نوازے جانے کی خبر کا خیر مقدم کرتے ہوئے دلچسپ تبصرے کیے۔

صارف ولید نے بابر اعظم کی تصویر شیئر کرتے ہوئے لکھا کہ ’پہلا ستارۂ امتیاز ہے جو قابل کھلاڑی کو دیا جا رہا ہے۔‘ 

میری معروف نامی ٹوئٹر صارف نے بھی قومی کرکٹ ٹیم کے کپتان کی تصویر شیئر کرتے ہوئے کہا کہ ’بیٹھا تو ایسے ہے جیسے ستارۂ امتیاز ملنے والا ہو!‘ 

صارف عدیلہ نے بھی اس خبر پر اپنی خوشی کا اظہار کرتے ہوئے بابر اعظم کو چاند قرار دے دیتے ہوئے لکھا کہ ’پاکستان کا چاند، ستارۂ امتیاز موصول کرنے والا ہے۔‘ 

ملک فیصل نے اپنی ٹویٹ میں لکھا، ’ستارۂ امتیاز یوم پاکستان پر بابر اعظم کا استقبال کرنے جا رہا ہے۔‘ 

واضح رہے صدر پاکستان کی جانب سے مختلف شعبوں میں  ہر سال نمایاں کارکردگی دکھانے والوں کو سراہنے کے لیے سول اعزازات سے نوازا جاتا ہے۔