پشاور: سیاحت کے لیے آئے اطالوی شہری کی مبینہ خودکشی

پشاور پولیس کے ترجمان عالم خان نے بتایا ہے کہ ابتدائی تفتیش میں غیرملکی شہری کی شناخت جوشوا موائسز ورگاس کے نام سے ہوئی ہے جنہیں نو اکتوبر کو پاکستان کا سیاحتی ویزا جاری ہوا تھا۔

پولیس پشاور میں اس فلیٹ کا جائزہ لے رہی ہے جہاں سے ان کے مطابق اطالوی سیاح کی لاش برآمد ہوئی ہے (تصویر: رسول داوڑ)

خیبر پختونخوا کے صوبائی دارالحکومت پشاور میں پولیس کے مطابق ایک اطالوی سیاح نے فلیٹ میں مبینہ طور پر خود کشی کی ہے جس کی تفتیش جاری ہے۔

یہ واقعہ پیر کو پشاور کے باصر باغ روڈ پر ایک پلازے میں واقعے فلیٹ کے اندر پیش آیا ہے جہاں سے پولیس کے مطابق اطالوی سیاح کی لاش برآمد ہوئی ہے۔

پشاور پولیس کے ترجمان عالم خان نے انڈپینڈنٹ اردو کو بتایا کہ ابتدائی تفتیش میں غیرملکی شہری کی شناخت جوشوا موائسز ورگاس کے نام سے ہوئی ہے جنہیں نو اکتوبر کو پاکستان کا سیاحتی ویزا جاری ہوا تھا۔

پولیس ترجمان کا کہنا ہے کہ یہ اطالوی شہری 18 اکتوبر کو باچا خان ایئر پورٹ پشاور پر سعودی ایئرلائن کی پرواز 796 کے ذریعے پاکستان میں داخل ہوئے تھے اور سیاحت کی غرض سے ایک نجی فلیٹ میں رہائش پذیر تھے۔

عالم خان کے مطابق ’اطالوی سیاح نے ایک نجی ویب سائٹ پر فلیٹ بک کیا تھا اور اسی میں رہائش پذیر تھے۔ یہ ایک نجی پلازہ ہے جہاں کرائے پر فلیٹ ملتا ہے۔‘

مزید پڑھ

اس سیکشن میں متعلقہ حوالہ پوائنٹس شامل ہیں (Related Nodes field)

پشاور پولیس کے مطابق ’اس افسوس ناک واقعے کے بارے میں وزارت خارجہ کو آگاہ کر دیا گیا ہے اور مبینہ خودکشی کے حوالے سے دفعہ 174 کے تحت تفتیش کی جا رہی ہے۔‘

یہ واقعہ ناصر باغ پولیس سٹیشن کی حدود میں پیش آیا ہے جہاں کے ایک اہلکار مسلم خان نے انڈپینڈنٹ اردو کو بتایا کہ اطالوی سیاح کی لاش کو پوسٹ مارٹم کے لیے ہسپتال بھیج دیا گیا ہے۔

انہوں نے بتایا کہ تاحال پوسٹ مارٹم کی رپورٹ جاری نہیں ہوئی ہے۔ رپورٹ آنے کے بعد اصل حقائق کا پتہ لگایا جا سکے گا۔

زیادہ پڑھی جانے والی پاکستان