پولینڈ کی سٹار ٹینس کھلاڑی ایگا شوئتک نے ہفتے کو ومبلڈن ویمنز سنگلز کے فائنل میں امریکی امینڈا انیسیمووا کو ’ڈبل بیگل‘ سے شکست دے کر نہ صرف اپنا پہلا ومبلڈن ٹائٹل جیتا بلکہ ٹینس کی تاریخ میں ایک نیا باب رقم کر دیا۔
شوئتک نے یکطرفہ مقابلے میں انیسیمووا کو ابتدائی دو سیٹوں میں سے چھ - صفر، چھ - صفر سے ہرا کر چھٹا گرینڈ سلیم اپنے نام کیا۔
لندن کی روشن سہ پہر کو شوئتک نے آغاز ہی سے شاندار کھیل پیش کیا اور پہلے سیٹ میں انیسیمووا کی سروس تین بار بریک کرتے ہوئے صرف 28 منٹ میں پہلا سیٹ جیت لیا۔
دوسرے سیٹ میں بھی صورت حال بدلی نہیں۔ امریکی کھلاڑی مکمل طور پر دباؤ میں آ گئیں۔
وہ بار بار اپنے کوچنگ سٹاف کی طرف مدد کے لیے دیکھتی رہیں مگر شوئتک کی ’مشینی‘ کارکردگی کے آگے وہ بے بس نظر آئیں۔
صرف 57 منٹ میں فائنل اس وقت سمٹ گیا جب شوئتک نے دوسرے میچ پوائنٹ پر بیک ہینڈ ونر مار کر ٹائٹل اپنے نام کیا۔ وہ ومبلڈن جیتنے والی پہلی پولش کھلاڑی ہیں۔
یہ ومبلڈن کی تاریخ کا پہلا ’ڈبل بیگل‘ فائنل تھا جو 1911 کے بعد کسی خاتون کھلاڑی کو نصیب ہوا جبکہ کسی بھی گرینڈ سلیم فائنل میں اس طرح کی فتح آخری بار 1988 کے فرنچ اوپن میں سٹیفی گراف نے حاصل کی تھی۔
ایگا شوئتک، جو پہلے ہی یو ایس اوپن اور چار مرتبہ فرنچ اوپن کی چیمپیئن رہ چکی ہیں، اب تینوں کورٹس (ہارڈ، کلے اور گراس کورٹ) پر گرینڈ سلیم جیتنے والی سب سے کم عمر کھلاڑی ہیں۔
یہ اعزاز اس سے قبل 2002 میں 20 سالہ سرینا ولیمز کے پاس تھا۔
’ابھی بھی یقین نہیں آ رہا‘
فتح کے بعد میڈیا سے گفتگو میں 24 سالہ پولش کھلاڑی نے کہا ’یہ سب کسی خواب جیسا لگ رہا ہے۔ ٹینس مجھے حیران کرتی ہے اور میں خود کو بھی حیران کرتی ہوں۔ ہم نے سخت محنت کی اور نتیجہ ہمارے حق میں آیا۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
یہ تاریخی فتح اس وقت آئی جب شوئتک ایک برس کی ’ٹائٹل ڈرائی‘ کا شکار تھیں اور گذشتہ سال انہیں نیند کی دوا میں شامل ممنوعہ مادے کی وجہ سے کھیل سے مختصر معطلی کا سامنا بھی کرنا پڑا تھا۔
پولینڈ میں جشن کا سماں
پولینڈ کے وزیر اعظم ڈونالڈ ٹسک نے شوئتک کی فتح کے بعد انٹرویو دیکھتے ہوئے اپنے ہاتھ میں پاستا اور سٹرابیری کی تصویر شیئر کی جو شوئتک کا ومبلڈن کا ’چیٹ میل‘ ہے۔
پولش صدر آندرے دودا نے ٹوئٹر پر پیغام دیا ’ایگا، آج ومبلڈن کی گھاس پر تم نے نہ صرف پولش سپورٹس بلکہ پوری قوم کے لیے تاریخ رقم کی۔ شکریہ۔‘
ایگا اب صرف 120 میچز میں 100 گرینڈ سلیم فتوحات حاصل کرنے والی تیز ترین کھلاڑی بن گئی ہیں۔ یہ اعزاز آخری بار 2004 میں سرینا ولیمز نے حاصل کیا تھا۔
دوسری جانب 13ویں سیڈ امریکی انیسیمووا کے لیے یہ فائنل ایک خواب کی طرح شروع ہوا مگر بھیانک انجام کے ساتھ ختم ہوا۔
شکست کے بعد کورٹ پر اپنی نشست پر بیٹھی وہ اشک بار ہو گئیں۔ انہوں نے کہا ’آج میری کارکردگی ایسی نہیں تھی جیسی ہونا چاہیے تھی لیکن میں محنت جاری رکھوں گی۔‘
