کارلوس الکاراز نے آسٹریلین اوپن میں اپنی پہلی کامیابی کی تلاش میں جمعے کو شومین کورینٹن موتے کو با آسانی شکست دے کر پری کوارٹر فائنل میں جگہ بنا لی جبکہ ارینا سبالینکا نے کہا کہ فتح کے دوران وہ ’جذباتی طور پر بکھری ہوئی‘ تھیں۔
میلبورن پارک میں چھٹے دن موسم گرم اور دھوپ تھی، جہاں تین بار کے فائنلسٹ دانیل میدویدیف نے سخت مقابلے کے بعد کامیابی حاصل کی، جبکہ تیسرے نمبر کے سیڈز کوکو گاف اور الیگزینڈر زیوریف نے دن کے بعد کے مقابلوں میں شرکت کرنی تھی۔
سرفہرست سیڈ الکاراز کو فرانسیسی 32ویں سیڈ موتے کے خلاف کسی بھی موقع پر خطرہ نہیں ہوا اور اس نے راڈ لیور ایرینا پر صرف دو گھنٹے پانچ منٹ میں 6-2، 6-4، 6-1 سے میچ جیت لیا۔
یہ ہسپانوی کھلاڑی کا 100واں گرینڈ سلیم میچ تھا اور اس کا شان دار ریکارڈ اب 87 فتوحات اور 13 شکستوں پر مشتمل ہے، جو اسی مرحلے پر لیجنڈ بیورن بورگ کے ریکارڈ کے برابر ہے۔
فتح کے بعد الکاراز اب کوارٹر فائنل میں جگہ کے لیے امریکی 19ویں سیڈ ٹومی پال کا سامنا کریں گے، جس نے سپین کے الیخاندرو ڈیوڈووچ فوکینا کے گھٹنے کی انجری کے باعث ریٹائر ہونے پر میچ جیت لیا۔
22 سالہ الکاراز نے کہا: ’یہ آسان نہیں تھا۔ سچ کہوں تو جب آپ کسی ایسے کھلاڑی سے کھیلتے ہیں جیسے کورینٹن، تو آپ کو اندازہ نہیں ہوتا کہ کیا ہونے والا ہے۔‘
’لیکن میں نے کورٹ پر لطف اٹھایا۔ میرا خیال ہے ہم دونوں نے کچھ شان دار شاٹس اور پوائنٹس کھیلے۔‘
خواتین کی نمبر ون سیڈ آرائنا سبالینکا کو غیر سیڈڈ آسٹریا کی روسی نژاد اناستاسیا پوٹا پووا کے خلاف سخت جدوجہد کرنا پڑی۔ انہوں نے اعصاب شکن مقابلے میں 7-6 (7/4)، 7-6 (9/7) سے دو گھنٹے سے زائد کے میچ میں کامیابی حاصل کی۔
بیلاروس کی یہ کھلاڑی گذشتہ سال میڈیسن کیز سے فائنل ہارنے کے بعد اب چار سالوں میں تیسری بار ٹائٹل جیتنے کی کوشش کر رہی ہیں۔
انہوں نے کہا: ’میں ہمیشہ دفاعی پوزیشن میں تھی، ان دنوں میں سے ایک دن جب آپ کو صرف گیند واپس کھیلنے کے لیے لڑنا پڑتا ہے۔‘
’جذباتی طور پر میں بالکل بکھری ہوئی تھی،‘ 27 سالہ چار بار کی گرینڈ سلیم چیمپئن نے مزید کہا، جو اب کینیڈا کی نوجوان کھلاڑی وکٹوریا مبوکو کا سامنا کریں گی۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
’یہ واقعی ایک زبردست لڑائی تھی اور میں نے بہت لطف اٹھایا۔‘
19 سالہ مبوکو نے ڈنمارک کی کلارا تاوسن کو 7-6 (7/5)، 5-7، 6-3 سے شکست دی۔
کوکو گاف اب تک شان دار فارم میں رہی ہیں اور ان کا کہنا ہے کہ تیسرا راؤنڈ بنانا ’تقریباً کامل‘ تھا۔
21 سالہ گاف نے یو ایس اوپن اور فرنچ اوپن جیت رکھے ہیں، لیکن میلبورن میں ان کی بہترین کارکردگی سیمی فائنل تک پہنچنا رہی ہے۔
وہ اپنی ہم وطن امریکی حریف ہیلے بپٹسٹے کا سامنا کریں گی، جبکہ تیزی سے ابھرتی ہوئی روسی آٹھویں سیڈ میرا آندریوا رومانیہ کی ایلینا گیبریلا روسے سے مقابلہ کریں گی۔
ساتویں سیڈ اطالوی جیسمن پاؤلینی خطرناک امریکی نوعمر ایوا یووچ کے خلاف میدان میں اتریں گی۔
میدیویدیف کا بدلے کا مشن
روس کے 11ویں سیڈ دانیل میدویدیف آخری 16 کے مرحلے میں امریکہ کے 25ویں سیڈ لرنر ٹین کا سامنا کریں گے۔
یہ گذشتہ سال کے ان کے یادگار پانچ سیٹوں والے میچ کا ری میچ ہے، جب نوجوان ٹین نے میدویدیف کو دوسرے راؤنڈ میں حیران کن شکست دی تھی۔
جمعے کو میدویدیف نے ہنگری کے غیر سیڈڈ فیبیان ماروزسان کے خلاف دو سیٹوں کے خسارے سے واپسی کی۔
2021 کے یو ایس اوپن چیمپئن نے، جن کی گذشتہ سال گرینڈ سلیمز میں کارکردگی مایوس کن رہی، تین گھنٹے 43 منٹ میں 6-7 (5/7)، 4-6، 7-5، 6-0، 6-3 سے جیت حاصل کی۔
یہ ان کے کیریئر کا پانچواں موقع تھا جب انہوں نے دو سیٹوں سے پیچھے رہ کر میچ جیتا۔
انہوں نے میچ کے بعد کیمرے پر لکھا: ’پھر پانچ سیٹ!‘
دوسرے میچز میں، جرمنی کے زیوریف نے — جو پچھلے سال فائنل میں یانک سینر سے بری طرح ہارے تھے — اپنے ابتدائی دونوں میچز میں ایک ایک سیٹ گنوایا ہے اور اب وہ برطانیہ کے 26ویں سیڈ کیمرون نوری کے خلاف شام کے سیشن میں کھیلیں گے۔
میزبان آسٹریلیا کے مداحوں کی امید اور چھٹے سیڈ الیکس ڈی مناؤر کو ایک بار پھر راڈ لیور ایرینا میں پرائم ٹائم میچ دیا گیا ہے۔
اس بار ان کا مقابلہ خطرناک امریکی فرانسس ٹیافو سے ہوگا، جنہوں نے 2019 میں میلبورن کے کوارٹر فائنل تک رسائی حاصل کی تھی، جس کے بعد وہ رافیل نڈال سے ہار گئے تھے۔
