کیمبرج یونیورسٹی پریس اینڈ اسیسمنٹ نے کلائمیٹ کویسٹ کا پاکستان ایڈیشن متعارف کرایا ہے، جس کا مقصد نوجوان طلبہ کو ماحولیاتی بحران کا سامنا کرنے کے لیے علم، مہارت اور اعتماد فراہم کرنا ہے۔

یونیورسٹی آف کیمبرج نے منگل کو ایک بیان میں کہا کہ یہ ایک انقلابی ماحولیاتی تعلیمی پروگرام ہے، جسے لاہور یونیورسٹی آف منیجمنٹ سائنسز (لمز) کے اشتراک سے تیار کیا گیا ہے۔ 

بیان میں مزید کہا گیا کہ پاکستان ایڈیشن، کیمبرج کے عالمی عزم کا حصہ ہے جس کا مقصد ہر سطح پر ماحولیاتی تعلیم کو نصاب میں شامل کرنا ہے۔

یونیورسٹی آف کیمبرج کے بیان میں بتایا گیا کہ یہ مفت ڈھائی گھنٹے کا آن لائن کورس، جو اپنی رفتار سے مکمل کیا جا سکتا ہے، 8ویں سے 12ویں جماعت تک کے طلبہ کے لیے ڈیزائن کیا گیا ہے اور تمام تعلیمی بورڈز بشمول سرکاری سکولوں کے لیے دستیاب ہے۔ 

(کیمبرج یونیورسٹی)

’کورس ماحولیاتی تبدیلی کے بارے میں بنیادی آگاہی فراہم کرتا ہے اور عالمی سائنس کو پاکستان کے اہم مسائل جیسے 2010 کے سیلاب، 2017 کی ہیٹ ویو، لاہور کی فضائی آلودگی اور قومی پالیسیوں (مثلاً سیلاب سے بچاؤ کے منصوبے) سے جوڑتا ہے۔‘

بیان میں مزید کہا گیا کہ کلائمیٹ کویسٹ طلبہ کو یہ صلاحیت دیتا ہے کہ وہ اپنی تعلیم کو عملی منصوبوں میں ڈھالیں اور پائیداری و ماحولیاتی لچک کو فروغ دینے کے لیے اپنی کمیونٹی میں اقدامات کریں۔

کورس کی پاکستان میں ہونے والی افتتاحی تقریب میں سکولوں کے سربراہان، پالیسی ساز، صحافی اور وزارتِ ماحولیات کے نمائندے شریک ہوئے۔ 

اس موقع پر وزیر اعظم کی کوآرڈینیٹر برائے ماحولیاتی تبدیلی رومینہ خورشید عالم، وزیر ابتدائی و ثانوی تعلیم خیبر پختونخوا فیصل خان تراکئی اور پارلیمانی سیکرٹری فرح ناز اکبر موجود تھیں۔

چیف ایگزیکٹو کیمبرج یونیورسٹی پریس اینڈ اسیسمنٹ پیٹر فلپس نے اس موقع پر کہا کہ ’پاکستان ماحولیاتی بحران کی فرنٹ لائن پر ہے، لیکن یہ دنیا کی سب سے بڑی نوجوان آبادی میں سے ایک ہے، جو لچک، جدت اور صلاحیتوں سے بھری ہوئی ہے۔ 

’کلائمیٹ کویسٹ کے ذریعے ہم چاہتے ہیں کہ طلبہ نہ صرف ماحولیاتی تبدیلی کی سائنس کو سمجھیں بلکہ اپنے کمیونٹیز میں حقیقی فرق ڈالنے والے حل بھی تیار اور قیادت کریں۔‘

پاکستان میں کیمبرج کی کنٹری ڈائریکٹر عظمیٰ یوسف نے کہا کہ کلائمیٹ کویسٹ پاکستان صرف ایک پروگرام نہیں بلکہ عمل کے لیے ایک پکار ہے۔ 

’یہ ہماری آئندہ نسلوں کے لیے ہے تاکہ وہ آج اور کل کے چیلنجز سے نمٹنے کے لیے ماحولیاتی لچک اور ڈھلنے کی صلاحیت رکھتے ہوں۔‘ 

انہوں نے کہا کہ جب ہم مقامی تناظر کو عالمی تعلیم کے ساتھ جوڑتے ہیں تو ہم طلبہ کو اپنے آپ کو ماحولیاتی رہنما اور اپنی کمیونٹیز کے سفیر کے طور پر دیکھنے کے قابل بناتے ہیں۔‘