رحمان میڈیکل انسٹیٹیوٹ کے زیر انتظام رحمان میڈیکل کالج (آر ایم سی) میں نئے داخل ہونے والے ایم بی بی ایس طلبہ نے وائٹ کوٹ تقریب کے ساتھ ہی اپنی طبی تعلیم کے باضابطہ سفر کا آغاز کر دیا۔

تقریب میں طلبہ، ان کے والدین، فیکلٹی ممبران اور معزز مہمانوں کی بڑی تعداد نے شرکت کی۔

ترجمان کے مطابق تقریب کے مہمانِ خصوصی صوبائی وزیر برائے اعلیٰ تعلیم، مینا خان آفریدی تھے، جبکہ محکمہ اعلیٰ تعلیم کے اعلی حکام بھی اس موقع پر موجود تھے۔

صوبائی وزیر نے رحمان میڈیکل کالج کے تعلیمی معیار اور فیکلٹی کی کارکردگی کو سراہتے ہوئے والدین کو ان کے بچوں کی کامیابی پر مبارک باد پیش کی۔ ان کا کہنا تھا کہ منتخب ہونے والے طلبہ ہزاروں امیدواروں میں سے میرٹ پر چنے گئے ہیں۔

انہوں نے طلبہ کومخاطب کرتے ہوئے کہا کہ خیبر پختونخوا میں آر ایم سی جیسا ادارہ جہاں ایک چھت تلے سہولیات کا میسر ہونا اور اسی ماحول میں تربیت کے مواقع آپ کے لیے باعث فخر ہے۔ 

تقریب کے دوران طلبہ کو فیکلٹی ممبران کی جانب سے سفید کوٹ پہنائے گئے اور سٹیتھو سکوپس دیے گئے، جس کے بعد طلبہ نے مریضوں کی خدمت دیانت داری، ہمدردی اور پیشہ ورانہ ذمہ داری کے ساتھ انجام دینے کا حلف اٹھایا۔

تقریب میں رحمان میڈیکل انسٹیٹیوٹ کے اعلی حکام اورآر ایم سی فیکلٹی بھی شریک ہوئی۔ پرنسپل رحمان میڈیکل کالج، پروفیسر ڈاکٹر مختیار زمان نے تقریب سے خطاب کرتے ہوئے کہا کہ کالج میں طلبہ کی رہنمائی کے لیے باقاعدہ مینٹورشپ پروگرام موجود ہے، جبکہ نصاب کو اس انداز میں ترتیب دیا گیا ہے کہ طلبہ کو طب کے علمی، اخلاقی اور عملی چیلنجز کے لیے مکمل طور پر تیار کیا جا سکے۔

انہوں نے مزید کہا کہ حالیہ داخلوں میں، جو خیبر میڈیکل یونیورسٹی کے تحت منعقد ہوئے، رحمان میڈیکل کالج نجی میڈیکل کالجز میں طلبہ کی پہلی ترجیح رہا، جو ادارے کے اعلیٰ تعلیمی معیار کا ثبوت ہے۔

اس موقع پر سی ای او رحمان میڈیکل انسٹیٹیوٹ، شفیق الرحمان نے بھی خطاب کیا اور کہا کہ ادارہ معیاری تعلیم اور ذمہ دار ہیلتھ کیئر پروفیشنلز کی تیاری کے لیے پرعزم ہے اور ادارہ خیبر پختونخوا کی نوجوان نسل کی خدمت میں ہمیشہ کوشاں رہے گا۔

تقریب کے اختتام پر کارپوریٹ سماجی ذمہ داری کے تحت صوبائی وزیر نے آر ایم آئی کے اعلی حکام کے ہمراہ آر ایم آئی چوک کا افتتاح بھی کیا۔