اقوام متحدہ نے جمعرات کو کہا ہے کہ ایک لاکھ سے زیادہ افغان اور ہزاروں پاکستانی دونوں ملکوں کی مشترکہ سرحد پر لڑائی کی وجہ سے بے گھر ہوئے ہیں۔

اقوام متحدہ کے پناہ گزینوں کے ادارے یو این ایچ سی آر نے جمعرات کو ایک بیان میں کہا کہ ’افغانستان اور پاکستان کی سرحد پر جھڑپوں نے ہزاروں خاندانوں کو نقل مکانی پر مجبور کیا ہے۔‘

گذشتہ جمعرات سے سرحد پر پڑوسیوں کے درمیان جھڑپیں ہوئی ہیں، جب افغانستان نے پاکستانی فضائی حملوں کے جواب میں سرحدی کارروائی شروع کی تھی۔

اسلام آباد نے سرحد کے ساتھ تازہ فضائی حملوں کے ساتھ جوابی حملہ کیا ہے، جس میں سابق امریکی فضائی اڈے بگرام، دارالحکومت کابل اور جنوبی شہر قندھار سمیت متعدد مقامات پر بمباری کی گئی ہے۔

یو این ایچ سی آر نے کہا کہ ’افغانستان اور پاکستان میں سرحد کے ساتھ سرگرم تنازع کے درمیان حالات کشیدہ ہیں، دونوں ممالک میں اندرونی نقل مکانی کی اطلاعات ہیں۔‘

ایک افغان 28 فروری 2026 کو قندھار کے تختہ پل ضلع میں مہاجرین کے رجسٹریشن سینٹر کے قریب پاکستانی فضائی حملے کے مقام پر ایک تباہ شدہ کار کو دیکھ رہا ہے (اے ایف پی)

اقوام متحدہ کے ادارے نے خبردار کیا کہ ’ایک اندازے کے مطابق افغانستان میں ایک لاکھ 15 ہزار اور پاکستان میں تقریباً تین ہزار لوگ بے گھر ہو چکے ہیں۔‘

پاکستان اور افغانستان کے درمیان 1893 میں قائم کی گئی 1300 میل طویل سرحد ہے، جسے ڈیورنڈ لائن کہا جاتا ہے۔

ڈیورنڈ لائن، جس کے دونوں طرف پختون قبائل آباد ہیں، پر پاکستان کے صوبوں خیبر پختونخوا اور بلوچستان واقع ہیں، جبکہ افغانستان کے 9 مشرقی اور جنوبی صوبے ہیں۔

برطانوی خبر رساں ایجنسی روئٹرز کے مطابق پاکستان اور افغان افواج کے درمیان وسیع سرحد کے ساتھ متعدد مقامات پر جھڑپیں ہوئیں جبکہ افغانستان کے لیے اقوام متحدہ کے مشن (یوناما) کے مطابق منگل تک چھ روزہ لڑائی میں 40 سے زیادہ افغان شہری مارے جا چکے ہیں۔

افغان وزارت دفاع کا کہنا ہے کہ لڑائی شروع ہونے کے بعد سے 65 خواتین اور بچوں سمیت 110 شہری مارے گئے اور 123 زخمی ہوئے ہیں۔ 

پاکستان کے وزیر اطلاعات عطا اللہ تارڑ نے ان اعداد و شمار کو متنازع قرار دیتے ہوئے کہا کہ پاکستان صرف ’دہشت گردوں اور بنیادی ڈھانچے کی حمایت‘ کو نشانہ بناتا ہے نہ کہ شہری آبادیوں کو۔

افغانستان میں پاکستان کی سرحد کے ساتھ رہنے والے متعدد افغانوں نے اے ایف پی سے گفتگو میں کہا کہ وہ اپنے گھروں سے بھاگنے پر غور کر رہے ہیں کیونکہ بدھ کو دونوں ملکوں کی فوجوں کے درمیان لڑائی کے ساتویں دن شدید گولہ باری اور دھماکے ہوئے۔

طورخم بارڈر کراسنگ کے قریب لنڈی کوتل سے تعلق رکھنے والے فرید خان شنواری نے روئٹرز کو بتایا کہ ’دن میں مکمل خاموشی ہوتی ہے، لیکن جس لمحے ہم افطار ڈنر پر بیٹھتے ہیں، دونوں طرف سے گولہ باری شروع ہو جاتی ہے۔‘

اسلام آباد کا کہنا ہے کہ اس کے فضائی حملے، جو کچھ مواقع پر طالبان حکومت کو نشانہ بنا چکے ہیں، کا مقصد عسکریت پسندوں کو پاکستان پر حملہ کرنے کے لیے افغان سرزمین استعمال کرنے سے روکنا ہے، تاہم افغان طالبان عسکریت پسند گروپوں کی مدد کی تردید کرتے ہیں۔

وزیراعظم شہباز شریف کے سیاسی مشیر رانا ثنا اللہ نے جیو ٹی وی کو بتایا کہ پاکستان نے زیادہ تر اہداف حاصل کر لیے ہیں لیکن آپریشن جاری ہے۔

انہوں نے کہا کہ ’زیادہ تر تربیتی مراکز کو ختم کر دیا گیا ہے۔‘

رانا ثنا اللہ کے مطابق پاکستان کو ’تصدیق شدہ ثبوت‘ چاہیے تھا کہ افغان سرزمین حملوں کے لیے استعمال نہیں کی جائے گی۔

دوسری جانب ترک صدر رجب طیب اردوغان نے پاکستانی وزیراعظم شہباز شریف سے گفتگو میں جنگ بندی کی بحالی میں مدد کرنے کی بھی پیشکش کی ہے۔