راجستھان رائلز اس سیزن میں ویبھو سوریہ ونشی کو سپاٹ لائٹ میں لائیں گے جب وہ یشسوی جیسوال کے ساتھ اوپننگ بیٹنگ کریں گے، لیکن کپتان ریان پیراگ چاہتے ہیں کہ اس نوعمر باصلاحیت کھلاڑی کو ممکن حد تک میڈیا کی چکاچوند سے محفوظ رکھا جائے۔
راجستھان اپنی نئی انڈین پریمیئر لیگ مہم کا آغاز 30 مارچ کو گوہاٹی میں پانچ بار کے چیمپئن چنئی سپر کنگز کے خلاف کرے گی، اور سب کی نظریں سوریہ ونشی پر ہوں گی جو اگلے ہفتے 15 برس کے ہو جائیں گے۔
گذشتہ سیزن میں آئی پی ایل میں ان کی سنسنی خیز شروعات کے بعد ان پر خاص توجہ مرکوز ہے۔
ٹورنامنٹ کے دوسرے حصے میں زخمی سنجو سیمسن کی جگہ ٹیم میں آنے والے سوریہ ونشی نے لکھنؤ سپر جائنٹس کے خلاف آئی پی ایل میں جس پہلی گیند کا سامنا کیا اسے ہی چھکے کے لیے باؤنڈری کے پار پہنچا دیا۔
ایک اور میچ میں انہوں نے گجرات ٹائٹنز کے خلاف صرف 35 گیندوں پر سنچری بنا کر شاندار کارکردگی دکھائی۔
اسی سال کے آغاز میں زمبابوے اور نمیبیا میں ہونے والے انڈر 19 ورلڈ کپ میں انڈیا کی فتح کے بھی سوریہ ونشی معمار رہے۔ بائیں ہاتھ سے کھیلنے والے اس بیٹر نے فائنل میں انگلینڈ کے خلاف 80 گیندوں پر 175 رنز بنائے اور پورے ٹورنامنٹ میں ریکارڈ 30 چھکے لگا کر اختتام کیا۔
پیراگ نے کہا کہ گذشتہ سیزن کے کپتان سیمسن کے چنئی سپر کنگز میں جانے کے بعد سوریہ ونشی بدستور ہندوستانی بیٹر جیسوال کے ساتھ اوپننگ پارٹنر رہیں گے، جو اوپر کے نمبر پر دباؤ کو سنبھالنے کی صلاحیت رکھتے ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
پیراگ نے جمعرات کو صحافیوں سے کہا، ’اس سال قدرتی طور پر بہت زیادہ شہرت اور دباؤ ہوگا، لیکن بطور کپتان میں اسے کہوں گا کہ یشسوی جیسوال کو دباؤ سنبھالنے دیں۔‘
انہوں نے کہا، ’جیسوال اس کو سنبھالنے کی بھرپور صلاحیت رکھتے ہیں۔ ویبھو کے لیے کردار بس یہ ہوگا کہ جائیں، شاٹس کھیلیں اور فکر نہ کریں۔‘
گذشتہ سیزن میں 206 سے زائد سٹرائیک ریٹ سے رنز بنانے والے سوریہ ونشی نے حال ہی میں کہا تھا کہ ان کی نظر کرس گیل کے 175 ناٹ آؤٹ رنز کے ریکارڈ پر ہے، جو انہوں نے رائل چیلنجرز بینگلورو کے لیے بنائے تھے اور جو اب تک آئی پی ایل میں کسی ایک کھلاڑی کا سب سے بڑا سکور ہے۔
پیراگ نے کہا کہ وہ کوشش کریں گے کہ سوریہ ونشی کو میڈیا سرگرمیوں سے دور رکھا جائے تاکہ وہ اپنی فطری کھیل پر توجہ مرکوز رکھ سکیں۔
انہوں نے کہا، ’بطور کپتان میں اسے کہوں گا کہ زیادہ پریس کانفرنسیں نہ کرے، میڈیا سے زیادہ بات نہ کرے اور بس کھیل سے لطف اٹھائے۔‘
