برطانیہ کے وزیراعظم کیئر سٹارمر نے پیر کو اعلان کیا ہے کہ وہ لیبر پارٹی کی قیادت سے استعفیٰ دے رہے ہیں اور ساتھ ہی انہوں نے وزارت عظمٰی سے رخصتی کا ٹائم ٹیبل بھی جاری کر دیا ہے۔
وزیراعظم نے، جنہوں نے ویک اینڈ پر چیكرز میں اپنے اہلِ خانہ کے ساتھ اپنے سیاسی مستقبل پر مشاورت کی، بڑھتے ہوئے دباؤ کے بعد پیر صبح ڈاؤننگ اسٹریٹ نمبر 10 کے باہر خطاب کے دوران اپنے استعفے کا منصوبہ پیش کیا۔
وہ 2024 کے عام انتخابات میں بھاری اکثریت سے کامیابی کے صرف دو سال بعد اس عہدے سے دستبردار ہو رہے ہیں۔
سٹارمر کا کہنا ہے کہ وہ آئندہ چند ہفتوں میں نیا لیبر لیڈر منتخب ہونے تک وزیراعظم کے طور پر کام جاری رکھیں گے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
انہوں نے یہ اعلان اس وقت کیا جب ان پر بڑھتا ہوا دباؤ تھا کہ وہ اقتدار کسی نئے رہنما کے حوالے کریں جو حکومت کی گرتی ہوئی کارکردگی کو بہتر بنانے کی کوشش کرے۔
وہ جولائی 2024 کے عام انتخابات میں لیبر پارٹی کو بھاری اکثریت سے کامیابی دلانے کے بعد سے اقتدار میں تھے، مگر ان دو برسوں میں ان کی اور پارٹی کی مقبولیت میں نمایاں کمی آئی ہے۔
ان کے مستعفی ہونے کی ایک بڑی وجہ گزشتہ ہفتے کے خصوصی انتخاب میں اینڈی برنم کی کامیابی بھی بنی۔ گریٹر مانچسٹر کے مقبول سابق میئر نے لیبر قیادت کے لیے سٹارمر کو چیلنج کرنے کا ارادہ ظاہر کیا تھا۔
