پاکستان کے دفتر خارجہ نے اتوار کو ایک بیان میں بتایا سعودی وزیر خارجہ شہزادہ فیصل بن فرحان نے جلد پاکستان کے دورے کا ارادہ ظاہر کیا ہے۔

بیان میں بتایا گیا کہ آج نائب وزیراعظم اور وزیر خارجہ سینیٹر اسحاق ڈار نے شہزادہ فیصل بن فرحان کے ساتھ ٹیلی فون پر خطے میں حالیہ پیش رفت پر تفصیلی تبادلہ خیال کرتے ہوئے خطے کی ابھرتی ہوئی صورتحال پر گہری تشویش کا اظہار کیا۔

دفتر خارجہ کے مطابق شہزادہ فیصل بن فرحان نے کہا کہ وہ جلد از جلد باہمی طور پر موزوں تاریخوں پر پاکستان کا دورہ کرنے کا ارادہ رکھتے ہیں۔

’نائب وزیر اعظم نے اس کا خیرمقدم کیا اور امید ظاہر کی کہ یہ دورہ جلد ہی عمل میں آئے گا۔‘

بیان میں مزید کہا گیا کہ اسحاق ڈار نے ’اسلام آباد مفاہمت کی یادداشت‘ کے تحت خطے میں امن کے قیام کے لیے کام جاری رکھنے کے پاکستان کے عزم کا اعادہ کیا۔

انہوں نے وزیراعظم شہباز شریف، فیلڈ مارشل عاصم منیر، حکومت اور پاکستانی عوام کی جانب سے سعودی عرب میں ہیلی کاپٹر حادثے پر دلی تعزیت کا اظہار بھی کیا گیا، جس پر شہزادہ فیصل نے ان کا شکریہ ادا کیا۔