ہیکرز نے دنیا کی سب سے بڑی کرپٹو کرنسی ایکسچینج بائنانس سے 6.3 ارب ڈالر چرا لیے ہیں۔ تجزیہ کاروں نے اسے اب تک کا سب سے بڑا کرپٹو ہیک قرار دیا ہے۔ یہ ایک ایسا سائبر حملہ ہے جو سرمایہ کاروں کو ڈیجیٹل اثاثے رکھنے کے خطرات پر دوبارہ غور کرنے پر مجبور کر سکتا ہے۔
امریکی بلاک چین تجزیاتی فرموں ٹی آر ایم لیبز اور چین اینالسس کے مطابق اس حملے کے پیچھے موجود ہیکرز کا تعلق شمالی کوریا سے تھا۔
ٹی آر ایم لیبز نے ایک بیان میں کہا کہ حملہ آوروں نے 10 بلاک چینز پر بائنانس والٹس کو نشانہ بنایا اور تقریبا 20 منٹ میں زیادہ تر فنڈز منتقل کر دیے۔
بائنانس نے کہا کہ اس نے متاثرہ اثاثوں کو منجمد کرنے کے لیے شراکت داروں کے ساتھ مل کر کام کیا ہے اور اب تک تقریباً تین ارب ڈالر کا پتہ لگا لیا گیا ہے۔ اس نے باقی 3.3 ارب ڈالر کی صورت حال کا کوئی ذکر نہیں کیا، اور اس کی شریک بانی یی ہی نے کہا کہ ایکسچینج 'ہیکنگ کے تمام نقصانات' کو پورا کرے گی۔
بائنانس نے کہا کہ اس کے ڈپازٹس متاثر نہیں ہوئے اور اسے توقع ہے کہ اگلے 48 گھنٹوں میں رقم نکلوانے کی سروسز بحال کر دی جائیں گی۔
ٹی آر ایم نے کہا کہ اس حملے کی کئی خصوصیات شمالی کوریا سے جڑی پچھلی چوریوں سے ملتی جلتی ہیں، جن میں کرپٹو ایکسچینج بائی بٹ کا 2025 کا ہیک بھی شامل ہے جسے امریکی فیڈرل بیورو آف انویسٹی گیشن نے پیانگ یانگ کے ذمے لگایا تھا۔
اس نے ایک بیان میں کہا کہ ’ہم پورے یقین کے ساتھ یہ بات کہہ رہے ہیں۔‘
جنیوا میں شمالی کوریا کے مشن اور چین میں اس کے سفارت خانے نے فوری طور پر تبصرے کے لیے رائٹرز کی درخواستوں کا کوئی جواب نہیں دیا۔
تجزیاتی فرم چین اینالسس اور انڈسٹری کے دیگر ماہرین کے مطابق، یہ واقعہ دنیا کی سب سے بڑی کرپٹو چوری ہو سکتا ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
بڑی کرپٹو مارکیٹ میکر جی ایس آر کے سسٹمیٹک او ٹی سی کاروبار کے سربراہ اروند سری نواسن کا کہنا تھا کہ ’یہ تاریخ کا سب سے بڑا ہیک ہے۔‘
جمعے کو ایشیائی ٹریڈنگ میں مارکیٹوں نے فوری ردعمل ظاہر کیا۔
بٹ کوائن تین فیصد سے زائد گر کر 76,368 ڈالر کی چھ ہفتے کی کم ترین سطح پر آ گیا اور ایتھر 3 فیصد سے زائد گر کر 2,178 ڈالر کی دو ماہ کی کم ترین سطح پر آ گیا۔ مارکیٹ ایگریگیٹر کوائن گیکو کے مطابق، بی این بی، ایک ٹوکن جسے ابتدائی طور پر بائنانس کوائن کے طور پر لانچ کیا گیا تھا جسے بائنانس کی فیس ادا کرنے کے لیے استعمال کیا جا سکتا ہے، گزشتہ 24 گھنٹے کے دوران پانچ فیصد کم ہو کر 709.70 ڈالر پر آ گیا۔
توسیعی امریکی ٹریڈنگ میں کرپٹو ایکسچینج کوائن بیس گلوبل کے شیئرز میں 4.8 فیصد کمی آئی جبکہ بٹ کوائن کے خریدار مائیکرو اسٹریٹجی کے شیئرز میں تقریباً چھ فیصد کمی آئی۔
