کوک سٹوڈیو آغاز سے ہی خبروں کی زینت بنا ہوا ہے۔ پہلے گانے ’تو جھوم‘ سے لے کر اب تک جو بھی گانے ریلیز ہوئے قریباً سب ہی سوشل میڈیا پر چھائے رہے اور عوام سے پسندیدگی کی سند حاصل کرتے رہے۔

میشا شفیع ہمیشہ کچھ منفرد لے کر آتی ہیں اس لیے مداحوں کو ان کے گانوں کا انتظار رہتا ہے اور اس مرتبہ تو وہ اپنے بھائی کے ساتھ پرفارم کر رہی تھیں تو شائقین ان سے کچھ ’ایکسٹر آرڈنری‘ کی توقع لگائے بیٹھے تھے۔

27 فروری کو کوک سٹوڈیو کا ایسا گانا ریلیز ہوا جس کا شائقین کو بہت شدت سے انتظار تھا۔

گلوکارہ میشا شفیع اور ان کے بھائی گلوکار فارس شفیع کا گایا گیا گانا ’معزز صارف‘ ریلیز ہوتے ہی مداحوں کو بھا گیا اور ٹوئٹر پر ٹرینڈ کرنے لگا۔

اس گانے کو دونوں بہن بھائیوں نے کوک سٹوڈیو کے پروڈیوسر زلفی کے ساتھ مل کر پروڈیوس کیا ہے جب کہ گانے کے بول بھی فارس اور میشا شفیع نے ہی تحریر کیے ہیں۔

سید شہریار انور نامی ٹوئٹر صارف نے گانے کے مرکزی خیال کو اتنا پسند کیا کہ اپنے رائے کا اظہار کرتے ہوئے کہا: ’معزز صارف کو عورت مارچ 2022 کا آفیشل اینتھم بنا دیں۔‘

ٹوئٹر صارف عمیر واحدی نے لکھا: ’ہمارے اپنے ڈائنامائٹ بہن بھائی، فارس شفیع اور میشا شفیع۔ انہیں کوئی روک نہیں سکتا۔‘

ایک اور ٹوئٹر صارف نے لکھا: ’باغی روح کو کیسے تم سنبھالو گے۔ میشا شفیع آپ ملکہ ہیں۔ جادوئی گائیکی اور بہت طاقت ور بول۔ کیا عمدہ شاہکار ہے۔‘

احسن علی نامی ٹوئٹر صارف کا کہنا تھا کہ ’کیا خوبصورت گانا ہے۔ مجھے یہ گانا بہت پسند آیا یقیناً انہوں نے جادو تخلیق کیا ہے۔‘

کچھ صارفین یہ بھی سمجھتے ہیں کہ یہ ایک عام سا گانا ہے۔

ٹوئٹر صارف اقصیٰ نے اپنے خیالات کا اظہار کرتے ہوئے تحریر: ’کیا یہ صرف میں ہوں یا کسی اور کو بھی معزز صارف اس سیزن کا ثانوی نوعیت کا گانا لگا ہے؟

یاشار خان نامی انٹرنیٹ صارف کا کہنا تھا کہ ’میرا خیال تھا کہ کوک سٹوڈیو پاکستان کی عوام کے لیے ہے مگر ’معزز صارف‘ کی ٹارگٹڈ آڈینس کون ہیں؟ یہ گانا آدھا ریپ انگلش میں ہے اور وہ بھی بالکل بے معنی۔ مایوس کن۔