روسی فیڈریشن کی مسلم اکثریتی ریاست جمہوریہ چیچنیا کے صدر رمضان قادروف نے وزیراعظم پاکستان عمران خان کے نام اپنے خط میں ان کے دورہ روس پر شکریہ ادا کرتے ہوئے کہا ہے کہ وہ روس میں ان کی خدمت کے لیے تیار ہیں۔
چیچن صدر نے اپنے خط میں وزیراعظم عمران خان کو ’میرے بھائی وزیراعظم عمران خان‘ کہہ کر مخاطب کرتے ہوئے لکھا ہے کہ ’میں ہمارے درمیان ملاقات کے لیے وقت نکالنے پر آپ کا شکریہ ادا کرتا ہوں۔ میں اس بات پر بھی آپ کا شکریہ ادا کرتا ہوں کہ آپ نے روس کی جانب دوستانہ تعاون کا ہاتھ بڑھایا ہے۔‘
وزیراعظم آفس کی جانب سے جمعرات کو جاری کیے جانے والے اس خط میں رمضان قادروف نے مزید لکھا کہ ’روس میں آباد 30 لاکھ مسلمان آپ کو بہت عزت اور احترام کی نگاہ سے دیکھتے ہیں۔‘
چیچن صدر نے اپنے خط میں وزیراعظم عمران خان کی اقوام متحدہ میں کی جانے والی تقریر پر ان کی تعریف کرتے ہوئے لکھا کہ ’میں آپ سے ملنے کا منتظر ہوں تاکہ عالمی پلیٹ فارمز اور اقوام متحدہ میں اسلام کے بارے میں آپ کے موقف پر آپ کا شکریہ ادا کر سکوں۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
دورہ روس میں ملاقات کے بعد چیچنیا کے صدر نے وزیراعظم عمران خان کے نام خط لکھا ہے! کہا طویل عرصے سے آپ سے ملاقات کا خواہشمند تھا، اقوام متحدہ جنرل اسمبلی میں دین اسلام اور مسلم امہ سے متعلق آپ نے جو موقف اپنایا وہ قابل تعریف تھا- pic.twitter.com/FkLXdhYjbf
— PTI (@PTIofficial) March 10, 2022
خط میں چیچن صدر کا مزید کہنا تھا کہ ’میں اللہ کا شکر ادا کرتا ہوں کہ مجھے آپ سے ملاقات کا موقع ملا۔ ہم روس میں آپ کی ہر قسم کی خدمت کرنے کے لیے تیار ہیں۔ ہم دعا کرتے ہیں کہ دین کے مقصد، دفاع، جدوجہد اور ترویج کے قابل بن سکیں۔‘
اپنے خط کے آخر میں چیچن صدر کا کہنا تھا کہ ’ہم آپ کے اگلے دورہ روس کے منتظر ہیں۔‘
