’ڈیئر پریانکا! شرمین عبید پہلے پاکستانی، پھر جنوبی ایشیائی ہیں‘

شرمین عبید چنائے کو سٹار وارز سیریز کی فلم کی ہدایت کاری ملنے پر دنیا بھر سے کئی لوگوں نے مبارک باد دی ہے، جن میں بولی وڈ اداکارہ پریانکا چوپڑا بھی شامل ہیں۔

تاہم شرمین کے متعلق اپنی انسٹاگرام سٹوری میں پاکستانی کی جگہ انہیں جنوبی ایشیائی کہنے پر پریانکا کو اعتراضات کا سامنا کرنا پڑ رہا ہے۔

انہوں نے اپنی انسٹاگرام سٹوری میں شرمین کو مبارک باد دیتے ہوئے لکھا: ’پہلی غیر سفید فام اور پہلی خاتون سٹار وارز فلم کی ہدایت کاری کریں گی۔ وہ جنوبی ایشیائی بھی ہیں۔ یہ ایک تاریخی لمحہ ہے۔ شرمین میری دوست، مجھے آپ پر فخر ہے۔‘

پریانکا کی سٹوری پر اعتراض کرنے والوں میں ایک نام پاکستانی اداکار عدنان صدیقی کا بھی ہے۔ 

عدنان صدیقی نے پریانکا کو اپنے ٹوئٹر اکاؤنٹ میں ٹیگ کرتے ہوئے لکھا: ’پریانکا نہایت عزت کے ساتھ آپ کی معلومات میں اضافے کے لیے کہ شرمین عبید چنائے سب سے پہلے ایک پاکستانی ہیں۔

’بالکل اسی طرح جیسے آپ جنوبی ایشیائی ہونے کا دعویٰ کرنے سے پہلے جب بھی موقع ملتا ہے اپنے انڈین ہونے کا اظہار کرتی ہیں۔‘ 

عدنان کی ٹویٹ پر کئی صارفین نے اپنا ردعمل دیا۔ صارف فیصل کپاڈیا نے لکھا: ’آپ جتنی بھی کوشش کر لیں پاکستان کو بین الاقوامی بیانیے سے نہیں مٹا سکتے۔

’شرمین ایک پاکستانی ہیں اور انہیں یہی کہا جانا چاہیے، آپ جعلی اتحاد کے بہانے قومیت کو مٹا نہیں سکتے، کتنے انڈین ستارے ہیں جو ایک اعزاز جیتنے پر خود کو جنوبی ایشیائی کہیں گے ؟ نہیں وہ انڈین ہیں۔‘

’افشاں طیب نے لکھا: ’پریانکا نے کبھی بھی ایک انڈین کو جنوبی ایشیائی کے طور پر متعارف نہیں کرایا لیکن پاکستانیوں کی بات آتے ہی وہ جنوبی ایشیائی ہو جاتے ہیں۔‘

ایک صارف اشانت نے پریانکا کی حمایت میں لکھا کہ ’گھبرائیں نہیں، وہ پاکستانی ہے ہم سب جانتے ہیں۔ پریانکا چوپڑا نے شرمین کو ’جنوبی ایشیائی‘ کہا ہے صرف اس لیے کیونکہ وہ آسکر سے ایک ماہ قبل ’ساؤتھ ایشین ایکسیلنس‘ کا جشن منا رہی تھیں۔‘ 

امریکی فلم سٹوڈیو کے عہدے داروں نے جمعے کو اعلان کیا تھا کہ سٹار وارز کی تین نئی فلمیں تیاری کے مراحل میں ہیں، جن میں سے ایک کی ہدایت کار پاکستان سے تعلق رکھنے والی آسکر ایوارڈ یافتہ شرمین عبید چنائے ہوں گی۔ 

شرمین وہ پہلی خاتون ہوں گی، جو سٹار وارز سیریز کی کسی فلم کی ہدایت کاری کے فرائض انجام دیں گی۔