جہاں پاکستان میں ملکی سیاست کا میدان گرم ہے وہیں پی ایس ایل نائن کا آغاز بھی ہو چکا ہے لیکن سوشل میڈیا پر اس کرکٹ ٹورنامنٹ کا بائیکاٹ ٹرینڈ کر رہا ہے، جس کی وجہ پی کے ایف سی کا PSL 9 کے سپانسرز کی فہرست میں موجودگی ہے۔  

اکتوبر 2023 سے غزہ پر جاری اسرائیلی جارحیت کے خلاف دنیا بھر میں کئی برینڈز کے بائیکاٹ کا اعلان کیا گیا، جن میں میکڈونلڈ کے علاوہ کے ایف سی بھی شامل ہیں، اور اب پی ایس ایل کی جانب سے کے ایف سی کو  شراکت دار بنانا صارفین کو ناگوار گزرا ہے۔

پاکستان کی مشہور ڈیزائنر ماریہ بی نے اس سلسلے اپنے سوشل میڈیا ہینڈلز پر ویڈیو شیئر کرتے ہوئے پی ایس ایل کے بائیکاٹ کا مطالبہ کیا۔ ویڈیو میں ان کا کہنا تھا کہ ’ پوری دنیا میں یہ تحریک چل رہی ہے، پانچ ماہ سے فلسطین میں جو نسل کشی ہو رہی ہے اور ہماری پوری دنیا کے حکمران خاموش ہیں۔ ہم عوام نے یہ تحریک چلائی تھی، جس میں بہت بڑی بڑی کمپنیز جن میں کے ایف سی، میکڈونلڈ، کوک، پیپسی جو اسرائیل کے غیر قانونیت کو فنڈ کرتی ہیں، کو ہمارا بچہ بچہ بائیکاٹ کر رہا تھا۔ پاکستان میں یہ تحریک چل رہی تھی لیکن اسلامی جمہوریہ پاکستان میں پی ایس ایل کو شراکت داری کے لیے صرف کے ایف سی ہی ملا۔‘

انہوں نے مزید کہا کہ ’ہمارا سر شرم سے جھک گیا ہے۔ پوری دنیا ان کمپنیز کا بائیکاٹ کر کے بیٹھی ہے اور ہم پاکستان میں جشن منا رہے ہیں۔

انہوں نے کہا کیا کہ ’نسل کشی مذاق نہیں ہے۔ پاکستانی عوام پی ایس ایل کا بائیکاٹ کریں۔‘

اسی طرح سوشل میڈیا پر کئی دوسرے صارفین نے بھی اس شراکت داری پر اپنے غم و غصے کا اظہار کیا۔

ایکس پر شکیل احمد نامی صارف نے حکومت پاکستان اور پی ایس ایل کی انتظامیہ سے مطالبہ کیا کہ فی الفور یہ معاہدہ ختم کیا جائے۔

اینکر محمد اسامہ غازی نے لکھا کہ ’ غزہ میں جاری نسل کشی کی وجہ سے غیر مسلموں نے بھی کے ایف سی کا بائیکاٹ کیا جبکہ ہمارے پیارے ملک نے انہیں پی ایس ایل میں شراکت دار بنا لیا۔

زینب نے اپنے جذبات کا اظہار کرتے ہوئے لکھا کہ ’یہ کے ایف سی کو پی ایس ایل پارٹنرز کے طور پر کیسے استعمال کر سکتے ہیں۔ ہم فلسطین کی خاطر مہینوں سے اس کا بائیکاٹ کر رہے ہیں اور وہ ہمارے جذبات سے کھیل رہے ہیں۔‘

انہوں نے مزید کہا کہ ’ہر اس چیز کو ہمارا نا ہے جو بچوں کے قاتلوں اور ان کے قتل کی حمایت کرتا ہے۔ ہم فلسطین کے ساتھ کھڑے ہیں۔‘

ولی خان نے پوسٹ میں پی سی بی پر تنقید کرتے ہوئے کہا کہ ’ غزہ میں مصیبت زدہ بچوں اور لوگوں کی خاطر پی ایس ایل کا بائیکاٹ کریں‘

https://x.com/WaliKhan_TK/status/1758792289533526184?s=20

عاصم عدیل نے کہا کہ کے ایف سی پاکستان سپر لیگ کے ذریعے اپنی مقبولیت دوبارہ حاصل کرنا چاہتی ہے لیکن نوجوان فلسطینیوں کے خون پر اسے قبول کرنے کو تیار نہیں ہیں۔

حسنین نے بھی اسے ناقابل قبول عمل قرار دیتے ہوئے لکھا کہ ’ بچے مر رہے ہیں، اور کے ایف سی منافع کما رہا ہے ۔ یہ ناقابل قبول ہے۔ پی ایس ایل کو کے ایف سی کو چھوڑنا ہو گا۔‘

اس سلسلے میں انڈپینڈنٹ اردو نے پاکستان کرکٹ بورڈ کا موقف جاننے کے لیے دو دن تک مسلسل ان سے رابطہ کرنے کی کوشش کی، تاہم پی سی بی جی ایم میڈیا رضا راشد کی جانب سے کہا گیا کہ وہ اس بارے میں پی ایس ایل منیجمنٹ سے بات کرنے کے بعد ہی کوئی ردعمل دے سکیں گے۔